mercredi 28 novembre 2007

Las municipalas e lo mescladis communal


Lo PC en passa de desapareisser.
Los Vèrds panats pel Nicolas Hulot.
Lo modem polid un temps en plena panada ara .
E la senestra estrèma que creis ... pichòtament
Lo PS complètament demargat , malcorat; decebut , agre.
A drècha , lo Fn garrèl , que subreviura pas a son amiral.
L' UMP que festèja alara que las banlègas tornan aviudar lo fuòc del desepèr .
L'UMP que crei d'aver fach un còp polit contre los servicis publics e que donan encara mai d'argent pels èiritièrs rics.
Tot aquò sentis missant.
Tot aquò sentis lo desamor , la guèrra.
Per tot aquò nos cal tornar trobar las raices , sapiença , tolerancia , paratge e democracia.
Un còp encara . Cal decentralisar los poders e construsir l'Euròpa dels pòbles. Que lo modèl franchimand es a mand de crebar.

lundi 26 novembre 2007

Consi ganhar pus sens trabalhar

D'unes i son arribats . Cal pas lo mostrar del det guinhaire . Son las estelas de la television, del governament e de la borsa.
De segur caldra trabalhar pus per ganhar çà mèsme. Mas se podiam ma miga aimada ganhar totjorn pus , sens poder arrestar lo flume poderos de las riquèsas que rajan de pertot dins los camps de petròli , dins l'ex URSS , al Brasil , o encara melhor, de la susor sanhosa de las esquinas plegadissas e cansadas dels chineses o dels indos.
En tornant de China Nicolas va metre al talh , come dison , los qu'an pas jamai vist un talh , la refòrma de las retiradas , la refòrma dels 35 oras, la refòrma de la santat, la refòrma de la refòrma .
De segur , soi content que los françèses ajèsson votar per Nicolas. Los paures d'esperit gelosavan los que trabalhavan cinq ans de mens. Serem totis parièrs . Va plan. Coma los lemings.
Los rics an ja recebuts lors 15 milliards d'euro prometuts per lo garda-falord-fiscal . Los gelos van trabalhar lèu 5 ans de mai dusca 65 ans . Es pas que la debuta. Puèi pagaran de mai en mai per la santat mentre que las asseguranças , los professions liberalas n'aprofiecharan fòrça s'emplenaran las pòchas, per comprar encara mai dins l'imòblièr. Mas los ganhants majors seran encara un còp los borsicòtaires e(o) la mafia que sabem pas pus destrigar.
A elses de trabalhar pus per ganhar un max. Als autres de calcular.
Los grands economistas l'an dich: cal pas descoratjar l'internacionala dels rics. Lor cal 15% de rentabilitat pareis, se que non s'en van a l'est , cap a l' Asia onte lor tomba 30% l'an.

Alara aquesta Terra revertara lèu una formiguèra , e sabon pas quantes de fòrças de policia caldra per mantener la patz..... pels amics de Nicolas.

samedi 24 novembre 2007

O YE


Dins lo cadre de la diversitat culturala, cal ben , paures mondes agachar endacom mai, qu'en França , cal ben o dire avem plan lèu far lo torn del sicut. Coma veni de tornar de Niou Iòrq e qu'ai pogut viure la setmana, consi ne virava , m'en soi trobat espantat de veire que son bravament mai tolerants que nosautres aici.
D'en primièr qu'ambe la femna , nos èrem trobat un "Bed and Breakfast" a Harlem . E que sai qu' a la debuta me diguèri que m'èri un pauc enganat, tròp al nòrd, en cresent qu'èra pas tan luenh qu'aquò del centre nevralgica , qu'èrèm pas a mai d'un kilomètra a pè de Central Park .
Alara los que te dison , que cal marchar , son braves , vertat que podem totjorn marchar de longa , quite al sèr de se tornar trobar crebats coma d'ases , ambe las cambas redes coma de la fusta ... Brèu èra una descubèrta vertadièra , benlèu un gaire plan tròp imaginativa , aventurosa que cresia pas de me tornar trobat tant avançat dins Harlem. Mas foguèt una deca salutaria...
Amaginètz , tant que voldrètz qu'ai pas jamai trobat de monde tant simpatica , serviable , plan a l'escota del paure toristicairòt que cerca pas sonque qu'una boca del metrò, la boita de las letras , o lo pòste de telefona. Quand seria pas que per pissar ....
Te per dire , un ser que dintravam cansats del centre vila , e qu'aviam crompat un tiquet "single unlimited" per la jornada , vaiqui que d'un còp los tiquetons quitèron de marchar e que d'unas lampas passèron al rotge al contraròtle , mentre qu'una campana tindava per dire que dos paurots colhonets èron a mand de panar la companhia del "suburb".
Puta que sentiguèri la susor me banhar lo còl dusca'l moment onte lo calfaire "driver", un omenasse negre de dos mètres e sai que dos cent liures laissèt escapar en bufant doçament :" go go go" .
Braves de la comprenèla . Per un còp me demandi consi se seria passar aici?
Aquo's tot per aqueste sèr . Veirem lo jorn que ven...

mercredi 14 novembre 2007

Resistencia. Rics e paures

Lo monde sofris sens ren ne dire . Las gents dels ventres voides
Escotan lo prècha dels parla-plan .Se trufa belèu dels messorgièrs.
En se sarrant de las lors pelhas. Aici nos sarrem de nòstre ben
Qu'aici lo paure ten pas a ren. Sab sul dèt la leiçon amara
Levat lo rire de son nen . Que cerca de trapar lo sen.
De la sia maire que li para. Gibos, quèc, òrb, monde garrèl.
Se passejan auturos jol cèl Lo monde de la bèla cara
Lo monde que pudis son bren, E sas pichonas enganas.
Nos assabenta de tota mena . Consi panar lo paure monde?
Nosautres tanben, sens vergonha? Consi venir un ric,
Sens levar una palha Ambe un èr de dos,
Consi nos trobar la dralha Nos assabentar cada sèr
Nos paure monde vergonhos ; Qu'es al centre del monde.
Qu'an pas d'autras idèas Mèsme quand lo merlhe siubla
Mèsme quand lo solèlh lusis A la vesprada davalada .
Al clarabrun sorne. Que de trabalhar sens viure; Per ganhar de que viure.
Nos assabenta de panar pus .
Als mai paures que nos. Per n'estre que mai liure Qu'avem perduts tota joià?
E que sabem pas pus qu' aièr...
Qu'un jorn dins son enfancia Tenian çò que d'èstre fièrs
De nòstra fisança. De nòstra misèria... De Nòstre paure ben
La vida se passèt Al long del florit mes de mai
Plen de fòrça e de sang secat Sus las parets... a mai
.... una lagrema.
De flor en forma de poèma
Inacabat
Sai qu' un jorn s'acaba Lo resson de la vida oblidada Bruch de ròdas ensanhosidas dins las vanèlas
Per nos de l'esquina gibosa A l'uèlh torçut a força de pregar clinat devers la tèrra. Per una armòna Que vendra pas jamai, sens mesprès Elses e nos sens paraulas comunas Elses e nos sens ren a nos dire Que lor poder per nos , Non val pas sonque ,
L'alena lèugièra d'una ròsa.

dimanche 11 novembre 2007

Lo petròli e la religion


Onte es que lo petròli es lo mai segur?
Onte es que la religion es la mai fòrta e los dreches de l'òme los mai estrechs?
Qual païs escanèt los autres quante volian aumentar lo prètz ?
Qual païs mèstre de l'aur negre , lo milhor aligat de l'occident s'escapèt coma per miracle, de la justicia aprèp los attentats terrorristas?
N' i a pas qu'un.
Vos laissi devinar.
Per que pas amaginar que l'Irack , ièr laïca, es uèi vodat a la guèrra civila , e als fondamentalistas de tota mena ayatolahs, Sunites o Chiitas. Fin finala basculara lèu dins l'islamisme lo pus fòrt pel sol profièch des occidentals..
I a pas ren de melhor que la religion per tener lo pòble a la sia plaça.
Mas alara de que pensar de totes los ultras religios que prechan l'islam aici e ailabas sens que jamai lo pòble trapa un pauc de la riquèsa que raja de pertot entre las mans dels religios emirs.
Dison que la religion islamica volonta lo partage , aquò's vertat , coma la religion catolica o precha dempuèi mai de dos mille ans... Ambe la capitada qu'òm sab...

Encara un còp , nos mostra que las religions son plan lo pus bèl aplech per matar lo pòble, mentre que los poderos dançan bravament lor vida a Almeria , Las Vegas o Nice e endacòm mai....

vendredi 9 novembre 2007

Petrolas e guerras previstables


Lo petroli lèu mancara. Lo petroli e lo demai , zinc, plomb , fer , , gas , alumini, urani ece.....Mas encara lo blat , lo milh , la carn ece
Mas lo pétroli es la basa de tot. El commanda tot lo demai.
Servis per los engrais, per asaigar las culturas de totas menas, pel transpòrt que servis de portar las recòltas al super mercat , ont lo ciutadan vengut internofila , e paperassièr , pòd anar crompar de que minjarcada jorn , ambe la sia veitura. Servis per fabricar , l"eletricitat , las maquinas que fan l'eletricitat, que servisson elas tanben a fabricar d'autras maquinas.
Servis encar de fabricar los potingas ,e lo plastica que trobem de pertot . Brèu lo petròli es omnipresent tant que lo vesem pas pus...
Aital , nosautres los joves e mens joves que savon pas sonque molzer una cabra , o far grèlhar de jòlvèrd sem mal partits.
Que venga de faltar lo petròli e... Paure monde ...Que tardariam pas de veire de malastres que serian pas de creire , o que cresiam jetats a las escobilhas de l'istòria, d'una descarga escura dels sègles passats .
Tanben la dança de la guèrra entreprèsa alentorn de l'Iran , e en seguissent per un grad mendre a l'entorn de la Russia , nos mostron çò qu'es a mand d'arrivar. Tot es sinhe levat que los governs poderos an pres lo biais de tot amagat.
L'Iran seria la seconda reserva de petròli del monde , e la Russia la tresena .
Pus grèu l'Iran se troba dins lo meteis ròdol que l'Arabia Saodita , lo Koveit , los emirats ...Praquò a pas besonh de la bomba per clavar l'estrech d'Ormuz
La bomba atomica es pas qu'un pretexte , que lo Pakistan estat terroriste se ne'n ia , la ten sens que degun semble d'i cercar de bregas. S'agis donc de far sentir a l'Iran que dèu plegar e despartir lo petròli se que non va se'n patir per de camins sens peiras .
La Russia es esclairada pel meteis lum.
Gondolizza Rize diguèt n'a gaire que : las riquèsas de las matièras primièras de la Russia èran vertadièrament escandalosas....
Estranjament aquelses dos païs se retroban ligats per un pacte d'ajuda recipròqua , que los païses rics asatjan de far sautar. de fach son dins la meteissa galèra.
E sembla plan que l'Euròpa , los USA e Israèl an decidat que las riquesas petròlièras devrian èstre despartidas , que s'agis del nòstre subreviuda, per las rasons dichas pus naut a la debuta .
E qu'aquelses dos païs van pagar car se lor pren l'enveja de nos rosigar nostre nivèl de vida .
Cresètz pas amics
Amen

mardi 6 novembre 2007

Lo poder de comprar o trabalhar pus... Apocalipsa ara...


Uèi vos disi bonjorn fraires umans.
Mas las novèlas son pas bonas!
Que son a mand de me copar totes los aubres d'alentorn e que per ma fe : anem totes crebats nosautres lo vilatge dels orang outang d'Indonesia... Ja se vei de pertot las planas semenadas d'OGM per fa lo gazòli dels païs rics...Lèu i aurem pas cap d'aubres...
Mas davant de quitar la scèna l'ome , vòli te dire que tu tanben es a mand de desapareisser.
Te ven de legir un article d'un païs luènhtan que se sona la França, onte i a un òme novèl president que vòl que los sèus estatjants ganhan milhor la vida.
Amassèt donc los grands vizirs de l'economia a començar per los astrològs de l'INSEE , los quals declarèron sens lo pus pichòt tremoladis que : lo cost de la vida quitava pas de baissar.
Ren que per aquò auriam meritat lo prèmi Nobèl dels grands comicas de primièra .
Lo novèl president diguèt que ne'n avia un sadol d'un indici que volia pas dire res.
Aital demandèt una estudia independenta, que siague pas las dels jesuitas.
Los tipes li donnèron la conclusion .
L'indici de l'INSEE reverta de ren, totas las aumentations son parametradas, alisadas , corregidas segond un calcul savant , que degun i compren pas res pus .
Per acabar un eisemple :
per un revengut de 1000 euro, un còp pagadas las despensas "obligatòrias" una familha ten pas pus , a quicòm pròche que 250 euro per se noirir , se vestir , e se descansar...
Milhor per 20% de las familhas las mai paures lo pès de las despensias impausadas son passadas de 50 a 75 % dempuèi 2001. Siès ans a pron pèna...
Cò que nos fa dire un còp de mai que: la libertat del mercat reverta la libertat del lop dins la jaça. E qu'òm pòd pas donar 10% de mai, cada annada; als paucs vals de borsicòtaires, a los qu'an, mantuns còps , tocat la fortuna sonque en naissent , e del meteis còp pensar a la solidaritat.
Elementari mon car Watson...

dimanche 4 novembre 2007

l'Euròpa e l'Occitania. Deman l'englès per totes Ah A h Ah


Los occitans ne son a se demandar çò que caldria far per èstre ausit de Bruxèla . Se tròba que los quites govèrnaments de drecha coma de senestra françimands o pas volon pas nos escotar.
Lor parlèm de democracia , de respecte , de drèches a la diferencia, nòstre parladis capita pas de traucar.
Sem donc ambe los autres mespresats , Bretons , Catalans , Bascs, Corses e Alsacians, creòles eca , sèm donc agachats coma dels falords dolces, de paures calucs qu'an perduts la partida fa bel temps. Quand s'agis pas de dangeiros terroristas qu'an pas encara comprès la grandor e la noblèssa de la langua de Molièra , e la meravilhosa continuitat republicana aprèp lo miracle de la reialtat. Tot prova ara que lo Jacobin perseguis totjorn sa tissa de nos crebar. E que cal trobar quicòm mai per se far ausir.
Los occitanistas volon creire que l'an pas perduda la partida. Mas praqu'ò coma o diguèt lo grand Bodon: ne'n sem al darrièr jòc. Encar pus luenh que lo darrièr jòc!
Nos demora pas pus qu'un darrièr agantal. Devers los cap mèstres dels autres païs , e subretot los del terç mond onte la França s'agrada de far la leiçon en parliquejant dels dreches a la diferencia , e dels respect de las culturas amenaçadas.
Nos cal escriure a totes per explicar consi sèm traitar aici , dins lo païs que foguèt antan lo paire dels dreches de l'òme.
Ambe Tolosa candidata al titol de capitala culturala per 2013 avèm lo temps d'apreparar las letras, informacions , estat del luòc eca , que mostraran la violencia que nos fan aici.

jeudi 1 novembre 2007

Los mòrts del capitalisme


Una idèa bestiassòta que me venguèt sai que un ser de plena luna.
Cadun sab los crimis de Hitler , de Staline . Mas de degun li vendrian l'idèa falordièra d'empegar los millions de mòrts de las traites d'esclaus al capitalisme naissent. Praquò se sosquem una minuta a la question , la responsa es aisida de trobar. Raja de sorga.
Luenhtans e nivolos los mòrts de l'esclauvatge, veire?.
Om coneis los mòrts del fascisme , del communisme. Los aprenon ara a l'escòla. E es normal. Mas es qu'òm calcula los mòrts dels capitalisme?
Minuta parpalhòl: Lo grand saut de Mao Tse Tong faguèt un brave million de mòrts .
Lo colonialisme quand?
E quand lo FMI demandèt al Nigeria de daissar tombar las ajudas publicas, e que de millions de paures bogres envejèron pas pus los enfants a l'escòla... A la vaccinacion , a las vesitas medicalas eca....
Quand los païses acabèron pas jamai de remborsar los interests , es a dire quatre o cinq còps lo principal , e que devian totojorn la meteissa sòma?
Praquò aquò's lo sistème major, eternal, omnipresent. V'aiqui per que lo sistèm capitaliste es major. Li comptem pas los mòrts que fan .
La mòrt es naturala . La mòrt capitalista es tot , levat politica. Aquò's natural...
Question : quand un enfant morris en Africa de talent , de set, o per que falta una vaccinacion que costa a quicòm pròcha 1 eurò; que lo govern en question applica sens tremolar la politic dels fons monetari internacional, la lei del mercat, e totas las conarias anglo saxonas . Qual pensaria a comptabilisar lo mòrt pichon , degun, es pas la question...
La natura es crudèla!!!

Per que , mas per que es natural . S'es mòrt lo nen es la fauta dels sèus parents , de l'aiga poirida , de la corrupcion, de la pauretat .
Mas subretot pas del sistèm capitaliste.
La famina en China, en ex-URSS en Inda, ven del sistèm politic.
La famina dins païses capitalistes ven de sab pas ont. Es la fauta del Diu
Quand un terrorist fa petar una bomba en França , en England , en America es un salopard de terroriste.
Quand una bomba pèta al Pakistan , en China, a Beslan en Russia es per la fauta del policièrs que sabon pas "gèrar" la crisi. En clar son d'ases, que nosautres sabem i far, e subretot , çò qu'es pas dich per que es raciste , aquò's que sèm superiors, mai intelligents .
Donc quand un òme creva endacòm mai a la susfacia de la Tèrra , se se tròba pas en "occident" es de sa fauta o la dels govèrn. Se moris en Francia , es per totas las rasons , levat la de la responsabilitat del govèrn , e del sistème capitaliste.
Tot aquò resuma plan la superioritat naturela del capitalisme; que torna sistematicament la responsabilitat devers los individualitats, e que dis, prècha, canta , que la lei del mai fòrt s'applica , o que dèu s"applicar , que lo pus garrèl dèu crebar, que cal s'adaptar , e de segur se calar.
Que s'as pas de pension , que se pòds pas se far sonhar coma cal, es de ta fauta , qu'as pas qu'a pron cotisar, e que se crebas 20 ans mai lèu que previst (çò qu'es pas verificable de tot biais) , e ben per aquò's que calias cotisar mai. Que satz pas se demerdar . Que cal pas èstre un assistat, e que sias pas gaire aluserpit. Per fenir que s'ameritava pas de viure benlèu...
E alara la responsabilitat del capitalisme, del govern; ont es?
M'as colhonat quand m'ai vist? Quitaras pas de ma cassar las bregas...
Lo capitalisme offris totes las possiblitats a los que son pas de faineants .
Pels autres podetz totjorn tornar tirar un autre bilhet , mas pietat prenètz vos en carga.
Vos daissi.
Juste unas informacions:
Avètz pas vist al Bengladesh, las inondacions... 15000 mòrts , qu'un malastre!!!
E en China l'exòda rural 10 000 mòrts , lo communisme dins tota son esplandor... Non?

Bon per çò que ne disi ièu ....