mercredi 30 septembre 2009

LO GOLAMAS




Imaginètz qu'aièr dins l'òrt, me passejavi , e que m'estonavi de veire lo mèu iranger ambe sa pichona iranja ( que me'n demòra pas qu'una aprèp la granissada que me petèt un velux , dels grans tant gròsses que de testiculas,ne diguèt lo vesin, que l'assegurança ne me'n donèt a pron pèna que trente euròs sus tres cents ) bon mas qu'es pas la question . Oc qu'aièr m'esbalausissià lo solèlh trufarèl , e las darrièras moscas, que voletejavan entre los mosquilhs, los estornèls e las irondas acarnassidas que pensan pas gaire de tornar dins Africa, malgrat qu'ajan pas cap de papèls ( e òc mossur Besson aquò's la jungle de l'aucelum aici ) bon mas aquò's pas lo
subject e:?
?de que vejèt?
Una sèrp governamentala ( mas pas gaire mentala) qu'assajava d'engolar un uòu , l'uòu EDF .
A quand soi arribat a Sant Estève aqui jos çò que vejèri .Qu'èra pas de creire aquela indisciplina...
LO golardas agachava los uòus de Molex, de Freescale, de EDF de GDF, e sai que de la Pòsta jà , entre qu'à França Telecom , d'òmes contunhavan de se tuar per causa de las condicions de trabalh. Una vergonha.
Aqueste còp l'uòu , o podran l'engolar?
Baste que s'escanen


lundi 28 septembre 2009

Catalunya bela

Còtlliure

Coma un viet poderos, que se quilha, per far l'amor a la mar. E qu'al cap raje lo vin fòrt, roge o blanc tremolat e laurat pels espermatosoïdes acarnassits, entre las andronas, silenciosas onte trèvan la toristalha.Dins sa cerca estranhièra
E que nasqua las libertats...
Multiplas e plondas dusca'l còr de Barcelona e de ......
Tolosa.... Dins sa vista amistadosa de nosautres, los oblidats de l'istòria .
E que grèlhen a l'encòp, d'unas protestas gigantas lo 24 d'octòbre tal un orgasme gauchosament polit sus las torres de Carcassona !

mercredi 16 septembre 2009

MOLEX

MOLEX DEU VIURE E PAS TOMBAR ENTRE LAS MANS DELS PAUCS VALS

mardi 15 septembre 2009

Crudeltat,


Pels òmes que se tuan a France Telecom o endacòm mai....Dins las prisons per exemple que France Telecom seria venguda mai qu'una preson?

Poesia pichona....





A solèlh colc,


Ven me vojar,

Un vin de grèmas.

Sabètz, un dels bons?

A temps passat,

A temps perdut,

Ven me porgir,

una musica capuda,

lèugièra, ambe una ulhet.

Que la man m'alisa la man,

Coma una serp dins la rosal

que lo tèu buf m'alena ,

las bonas nolors.

Ane , ven apiejar lo cap,

sus mon pitre.

Oc perfum, sospirs e rimas

Los d'un doç parladis .

samedi 12 septembre 2009

Sautaboc

Aimatz la diversitat coma aquel sautarèl golardas?

Ièu tanben , m'arriva de minjar de tot.

Oc e ambe de la salsa?

E volètz ne contunhar de minjar de tot , d'escotar de tot, de veire totas las colors.
Oc que la mòda es ecologica. Plan polid tot aquò. Baste que los meus pichòts enfants , conegan aquelses mondes en color.


A començar per las lengas , totas las lengas amai l'ingoch , que l'UE envèja d'argent , per far la leçon als russes (entre que França se'n chauta de tota la diversitat), o le turqmene qu'es pas sonque amenaçat de ren lo turqmene.
Non de començar per la lenga d'òc , aquela polida lenga que se degalha . E qu'a pas cap de tele , pas gaire de radiò , pas pronses d'escolans. Se que que non, deman, parlarem pas qu'anglès e dins vingt ans serem madurs pel mandcho.
E comptatz pas sus nosautres per aparar la francofonia amenaçada per ren, e que nos creba dempuèi mai de 1000 ans.
Tot aquò sens malvolénça , e en tota justicia.... Non?
Que los universalistes teoriques jacobinaires françèses an perdut la lutja , de nos far badar las bauduflas .
Aquò's acabat n'i a pron...

jeudi 10 septembre 2009

mardi 8 septembre 2009

Rana malabaricus


La granhòta tòrò africana arriba a 22,5 centimètres de long . Lo mascle es mai grand que la femenèla, çò qu'es pas costumièr per las granhòtas... ( costumièr dins nòstre païs, levat Jacouti ). Aquò's una granhota graissonèla , de la pèl color d'oliva e fòrça plegada longitudinalament . A una boca giganta , que los cunhs n'arriban a las espatlas, la maissa inferiora pòrta tres rengadas dentifòrmas . Las granhòtas africanas , son estarrissairas , dintran acuolhada dins la tèrra e se tancan, aital sebelidas , que daissan pas veire que la punta del nas. Coma las sias amigas americanas , minjan tot çò que se presentan, que que sià, que son conegudas per son canibalisme.. Demòran insucadas entre la sason sèca e ne sorton que per s'aparèlhar , a la sason de las pluèjas.; s'acampan alara dins d'unes lavanhas gaire plondas. Lo cant dels mascles e la poneson se debanan entre la jornada e alara degun gausa lor cercar brègas .

De fach venon malas bestias que sautan sul primièr , que vendra de pausar lo pè dins la sompa , o que se mostrèsse un pauc tròp curios , e lo caissejan maridament .

E cadun sab que l'agantal es fòrça doloros.

Per resumir que la rana malabaricus es una granhòta de la tèrre , afogada per desvelopament durable , ciutadenc , equitable, perene, es a dire qu'es contre la clavadura de las linhas segondairas dels camins de fer, las clavaduras de las agenças postalas o dels districtes EDF -GDF;

Dis la granhòta al jos prefecte qu'estarissa , el tanben lo nas dins lo fangum, que lo deficit de la secu es pas grèu: 12 milliard d'euròs mas de qu'es?

-EDF GDF 12 millards d'euros donat als actionaris en 2009

-ELF TOTAL 40 milliards d'euros donat als actionaris

-ASF 1 millard d'euros cada an donat als actionaris .

-France Telecom arroïnada per una còla de feneants e Orange qu'amassa de profièches qu'es pas de creire

  • BNP , Credit Agricole Soccietat Generala , Manlèu Lionès quante d'argent donat als actionaris ?

En 2009 las trentas primièras entrepresas (privatisadas) del CAC(A) 40 an donat 100 milliard d'euròs als actionaris.
Enfin per acabar i ajèt la fin de l'ISF , las baissas de las talhas pels rics. Que cal pas malcorar los rics , se que non nos donarèm pas ren pus , e d'en primièr tornaron pas al païs, diguèt lo Nicolas .
Nicolas es pas de la Còla .
Que passe un jorn per la sompa e se farà nhacar per las granhòtas buòus, que son pus tarriblas encara que las "malabaricus".

Ne'n oblide un fum sens capitar de me remembrar s'èra socialistes o UMP, los que privatisèron , a bels braçals , los benefices, tot en nacionalisant las pèrdas.

Es aital que soi vengut ara una mena de malabaricus occitan. E que demòra lo cuol dins la boldra, a las quitias sasons de las rainetas...

lundi 7 septembre 2009

aucel desconegut

Lo balaeniceps rex es un mena d'aucèl que s'ameritarià d'èstre occitan .
Per de qué?
Es un aucèl que vis dins las sanhas, de la pluma grisa,, massiu, de 1,2 mètre d'enauçada . Ambe un còl long,, de las patas nautas , e une tèsta poderosa. Ten un bèc ridicul, tan larg que long , e força plegat al cap .
Lo bèc en esclòp , un escaisnom, es un aucèl crentut, que passa la majora part del temps sol , o en coble, (coma los occitans) dins los fangas de l'Africa orientala ( AEF) ( Zaïra , Ogandà, Zambia , Sodan).
Minja los grands peisses longanhièrs , las gragnòtas , las tortugas, e benlèu los mamifères pichonèls. Ten per abitud de pòner dos uòus prèp del sòl, sus un airal plan planhièr , fach d'èrbas de paluns , de papirus...
Per ièu es un aucèl occitan . Que devrià estre occitan per tal dire. Qu'es extraordinaria , meravilhos , miracolos...
Per de qué? Qu'es un aucèl d'a fons desconegut que fa mai de 1,2 mètre d'açauda. L'auçada la mai nauta per un aucèl que trapa las gragnòtas, levat l'estruçi.
Que revèrta un pauc, un occitan se volètz, lo fraire, que l'occitan demòra pas qu'una mena de gigant euròpeenc completament desconegut.
E ièu li dona lo drèch de venir aici estatjar aici.... Sens papèls... En çò nòstre.
Coma diguèt un jorn a un françès lo balaeniceps rex :" nos avem fach cagar dos sègles e nos podem pas mai endevenir entre una parèlh d'annadas...Quna vergonha....
Es per aquò que lo balaeniceps rex es occitan.

dimanche 6 septembre 2009

Annada Jaures e TGV

Aqueste nuèch que mal dormiguèri; aici mon pantais...
Aièr que passèri pel capitòla per anar crompar un ase , veire un velò, que m'arriba de caminar per las carrièras de Tolosa , qu'ara es quitament pas possible , vist que Tolosa es en passa de trapar lo titol de Reina del Tap , pichons o gròsses, vist subretot que i aurià de monde emplegats a l'ostal de comuna, cargats e pagats per nos enebir de rotlar aisidament dins Tolosa....
Istòria de daissar la veitura.
Coeréncia de la politica perena ; ciutadana , durabla,equitabla, (ouf) te donan de primas per ne crompar de nòvas . Es a dire que te fan creire e esperar, que poiràs rotlar un jorn. Aquò's pas vertat .
E amai van clavar las linhas segondarias de camin de fèrre, o las garas , per exemple la linha , Milhau,Neussargues. Vertat qu'an fach una polida autorouta e un pont Eiffel- Lafage que cal pagar, mas quand dison que volon estalviar de petròli... Me fan petar la jos ventrièra...
Te demòraràs pas que de prendre la veitura , e de pagar la taxa carbona. Son pas cons los élégits. Elses tenon la veitura de fonccion.
Mas te podrà ambe lo TGV montar a Paris en très oras , que per anar a Milhau t'en caldrà quatre o cinq o siès , coma voldratz que serà liure de lo far a pès....
A Paris, Paris las pichonas femnas de Paris , luenh de la sèuna ambe viatge e restaurants e ostalariàs a gratis ....
Bon mas qu'es un autre subject .
Mai grèu. Ai encara vergonha de çò que vejèri sus la parèd de l'ostal de comuna. Fiers d'estre occitans e socialistes .
Mas lo socialiste françès e occitan se dis e definis coma un umaniste , se dis aparaire de la diversitat linguistica, del respect de la democracia , dels drèches dels pòbles , lo de parlar la sia lenga mairala per exemple . L'avètz vist quand esclafa una grèma en parlant de l'universalisme teorica de la republica; ..
Mas son pas d' aici. Aici son per la diversitat de totes , levat l'occitana. Son per la diversitat onte volètz, mas pas aici. De democratas vertadièrs qué! De las nivols ...
Aici son per l'uniformitat françèsa , una sola lenga, una sola religion , un cap pelat darrièr un cap pelat, coma a l'armada .
Es per aquò que son pas gaire , occitans , socialistes , umanistes e mens encara universalistes .
A mai son pas gaire ren . Son coma d'òmes qu'an tant cambiat, qu'an tot oblidat de las raices... Que cantan una cançon de castrat dins une lenga estrangièra. Perduts.
Que Jaurès poguèsse; voldrià pas tornar.

De que li poirà tornar l'enveja d'o far?
Ren

vendredi 4 septembre 2009

MITIS lo cercopiteca


Lo monin Cercopitèca es un cuòlpelat blau. Qu'estaja de pertot . Se sona MITIS . Ten las ussas argentadas, los pès e las mans de color negra . Las raças de l'Africa orientala tenon una gòrja blanca , subretot las femenèlas, las coquinòtas , que lo valon plan.

Son de grands monins tranquilles , que capèjan , o que nasèjan.

Son los mèstres de la selva vèrja , sieguts a la cima dels aubres los pus bèdres, nauts, polids , brancuts .

Espigan d'amont, la selva que se demesis, los òmes que revèrtan las formigas carnivòras . Que los òmes , los predators coma zo dison entre eles, escaraunhan tot ambe la tronçonosa, e raisvan pas que de copar totes los arbres , de tirar lo petròli, e tot çò que se pòd panar a n'aquelses pòbles , de la selva.

Qu'aquò's pas la talha carbona del Rocard , creator de la CSG e autres fotraladas qu'i cambiarà quicòm.. .

Coma diguèt un saberut un jorn :

  • la dictatura dis : cala te ....... e la democracia ressona : parla a mon cuòl , ai lo cap que me dòl...

L'elegit d' aquelses païs reverta plan los dels nòstres païses . Es anat a l'escòla...

A plan comprès qu'un còp elegit, es aqui per vendre los bens publics , en escambi de qualques avantages, legals , e òc, que coma cadun o sab lo capitalisme apara l'interessament dels trabalhadors , es a dire lo dels traders , dels deputats e senators. De tot biais s'aumentan lo salari regularament, los tipes , quand lo troban tròp menut ..

Es per aquò que lo monin Mitis cercopitèca blau de l'Africa Orientala, un còp èra, sonada « AEF », de son estat de savi e de brave , se rescontrarà jamai dins un corredor del governament . Que lo MITIS es quitament incorruptible ...

Qu'aima la natura e subretot los aubres.

mercredi 2 septembre 2009

Manifestacions occitanas



Cal saupre que lo dimenge 6 de setembre , a Mureth la batalha , a 9 oras , a la sala Alisèa del licèu Aragon se tendrà , lo foròm de las associacions . Cadun podrà s' assabentar sus la lenga occitana.
Cal saupre tanben , que lo 12 de setembre se tendrà prèp de la secu de Mureth l'acamp annadièr del POC31. E totes sètz convidats.
O podètz veire
sus las pinturas los occitans caparuts , (ièu e la mia sòrre) que lutchan tanben per l'espelida d'òc...
A mai, lèu se dubrirà le desen festenal OCCITANIA . E ambe la venguda dels gigants catalans a Tolosa.
Que ne'n tornarem parlar....
Enfin al mes d'octòbre i aurà la manifestacion giganta de Carcassona...
Ara cal soscar al 6 e al 12 de setembre.
Que Mureth va venir un far occitan...

mardi 1 septembre 2009

Baïona, Baïona , Baïona


Una cançon que reverta quicòm d'Occitania.
BAÏONA, BAÏONA,
BAÏONA



L'imne remirable del rudbi de

BAÏONA

Mas ont son las paraulas....