Mureth la divenca

Adiu aqui la videò prèsa del pont vièlh de Mureth. La prèsa de vistas es missanta mas se pòd veire al luenh las montanhas tant nautas que m'empescan de veire ont mos amors son. Amai Garona es mai que bèla , qu'aprèp totas las pluèjas , e ne'n tombèt qualques ferrats encara auèi, lo fum s'es ufla , e se carra entre sas ribas que rosiga doçament.
La vista es enganaira, coma totas las fotòs, que podria far creire qu'es una scena del film :" e al mitan cola una ribièra" alara que sem la vila de la Nauta Garona onte i a pas gaire d'espandis vèrds.
Las Pirenèas son a mens d'un centenat de quilomèstres , çò qu'es plan polit per anar a Bossòts cercar las pipas , o las botèlhas d'extrach de badiana esteleda . D'aquel pont m'agradi de fintar mantuns còps los fums de peisses qu'amagan lo fons cubèrt de còdols , e d'autres còps encapi pas de ne veire un sol. Amai i a de malinasses de la pèsca al gròs, qu'an ren trobat milhor que de deslargar de peisses-cat, venguts del Danube (blau) que minjan tot çò que passa a portada, las quitas grapauds pareis. Qu'elses lo planhi pas gaire, mas las granhòtas , aquò me fa pietat. Imagina una pichona granhota que trempa lo pè e que se troba dins l'estomar d'aquel golardas de cat que camina de rescondon jos las aiges negras.... Vergonha
Mureth es una vila de mai de 20000 estajants , qu'a pas qu'una sorga per l'aiga de la canèla, e qu'una estacion de trachament de las aigas d'escobilhas . Cò que fa que quand Garona s'enauça e ben la stacion tracha gès de ren; milantas merces per los vesins d'aval. Nautres va plan e vos?
Aici i a pareis un fum d'associacions, mas passat 8 oras se veis pas pus degun per las carrièras. I a pas pus de comèrcis de proximitat, que foguèron tuats per los grands ipermercats que grèlhan espès. Lo mièjorn tolosan se caracterisa per de salaris mai lèugièrs e lo caumatge pus fòrt qu'endacòm mai. Coma dis la drècha: " los chinèses los torçirem..."
Merce del plan Borloo los imòbles montan de pertot. Que sabi pas qual vendra estajar aici.
Coma dins totas las ciutats de la banlega de Tolosa, es çò mèsme , vòl dire sia, qu'ame lo rescaufament climatic anem reculhir un fum de monde , sia que l'argent de la mafia a trobat de se plaçar, sia que i a un fum de monde que se son fa colhonar per las bancas , car jamai tot aquò sera logat un jorn. Es aital que los "mas colhonat quand m'ai vist" de las agençias imòbiliaras refusan de prendre los dorsièrs novèls , e que volon pas dire sus Mureth quand i a d' apartaments vuèjas?
Lo chifre de 2000 lotjament per vendre es oficial.
Mas dins totas las comunas de la periferia del sud : Eaunes , Fonsorbes , Plaisance, Sant Lis , Roquas, Seysses , Cunhaus, Frozins , ... Es parièr.
Aquò's un fracatge imòbilier qu'es pas encara anonciat. Mas arriba dapassèt coma lo Titanic.
Bona annada , bona santat a totes los sòcis de las SCI... Sens malvolénça
De còr e d'òc.