lundi 31 mars 2008




















??I cresètz vosautres???

Tolosa candidata al titol de capitala culturala en 2013 convidèt l'Olivièr , non pas lo de la cançon de Rotland, los de la lucha de Saragossa contra als Sarrasins d'un còp èra, non es pas l'Olivièr que donèt son nom al titol d'una cançon de l'atge mejan. Es pas d'aquel Olivier glorios , descrich per los Normands, istòria panada pels francèses , coma o diguèt Lafont dins un libre sèu, titolat "la confidencia fantasiosa".
Non aquel d'Olivièr encargat d'aparar la vila de Tolosa se sona Poivre d'Arvor. Es lo responsable de la candidature de Tolosa que lucha contre Massilia de segur; e Lion benlèu eun fum d'autras ciutats, (e baste que l'Altzeimer me daisse encara trobar lo camin).
A n'aquèste prepaus , legiguèt que l'Olivièr escrivia tanben dins Lo Figaro , e que regretava fòrça la plaça pichona facha al françés dins las institucions de l'UE. Lo françès se parla pas pus.
Lo françès a perdut lo juòc e totis de s'enrabiar, l'Olivièr d'Arvor ambe totis sos companhs jacobins.
Regretava particularament que la ministre de la culture sonada Aubanèl , prechèsse per l'angles coma segonda lenga estrangièra( ( la prumièra qu'èra lo françès coma òm sab?) mai que mai necessaria uèi per totes los escolans . Atencion que la ministre non lo volontava, non i agradava pas de segur , mas volia solament prende en compte la realitat linguistica de nòstre monde. Olivièr li reprochèt son desfachisme e se prenguèt de somiar d'una mena de crosada...Pel françès...
Per ne'n saber mai cal legir l'article del siti còp de gula e talvera ; qu'es fòrça interessant. Un siti mai que mai saberut que furga al pus prigond de las rasons e de la realitat.
N'empecha que l'ostal de comuna e Moudenc fisèron l'organisacion de "Tolosa capitala culturala en 2013" a un ultra-franchouillard e que se pòd demandar consi; aquel òme qu'esperava n'i a gaire de capitar lo ròtle de director de la " Vila Medecis" a Rome e qu'es vertadièrament un jacobin dels milhors , consi podriam esperar ambe 'l d'aparar la nòstra cultura.
Monsen Olivièr d'Arvor pietat sètz pas qualificat per parlar de las culturas regionalas.
Daissatz nos a nòstre falorditge mème se devem pas capitar. Vos daissarem al vòstre.
E nos cal ausir , comprendre , encapar, realisar ara que mantuns còps quand nos donan quicòm los conses, e mème un Ostal d'Occitania, aquò's coma una mena de consolamentum en esperant , que lo contentament, aprèp tant d'annadas de misèra, nos adormira dins lo doç somi de la mòrt.
Lor passara dabant que me torna se dison. E nos cal pròvar que tot aquò nos torna cada matin en nos copant la barba peluda, dabant lo miralhet.

samedi 29 mars 2008

Païsatge endemic...Païsatge enemic-Felip Gardy



Felip Gardy escriguèt pas de poèmas "politics".Cò que legiguèri sens comprendre sai que.... Pareis que l'idèa de dintrar "dins la politica" lo fugiguèt entre las annadas"sixties". Plan domatge. Praquò es dels poètas mai grand de nòstra epòca e de nòstra lenga que sabem pas se va subreviure. Que m'auria agradat de legir son idèa del monde , de las guèrras , de la destinada umana, la dels mai paures , los mai malautes, atalentats de paraulas , entre lo monde, alara qu'aquel monde afica de longa las capitadas insolentas dels mai rics , dels pus bèls , de los que volon engolar una mena de buf d'eternitat, tot en coneissent la celeritat de l'oblid , la celeritat del temps que degun trapa pas, levat qualquas secondas d'éternitat al sens que li dona l''Andy Warol, temps que mascanha , e saquèja dusc'al fins fons la pus pichona pagina lausengièra de lor vida, e estrifa tot ram qu'esparan totis de portar entre las pots , coma un sinhe de patz vana e reconeissenta , per dire qu'an fach de lor milhor , entre que trepejavan sus la Tèrra , onte de tot costat, los "derricks" agotan la sang.
Mas sai que; las escrivèt las sias idèas en forma de poèma . Benlèu que l'òbra politica s'amaga darriè l'escrich d'una òbra poètica . Per jos aqui un que parla per totis.

Coma lo fretar mofle dei sasons
sus l'esquina dei còlas
dins lo blasin
dei oras arrenguièradas
la desbaruta lenta
a revèrs de la vida
dau païsatge endemic
entre sòm e vèlha
aquel espaci d'auba
que fara sa trauca definitiva
au fins fons dei cervèlas.

mercredi 26 mars 2008

2013 francocomica oc mas....... occitanesca.

Vergonha qu'a pron pena elegit , que d'òmes d'aici , des femnas tanben, tenon de promessas qu'an pas fachas.
Aqui la carta que m'arribèt...
Cresiai qu'en França la drecha subrepassava totjorn las sias promessas e que per exemple arribava de far pagar los paures per donar als rics; o nos demesir los remborsaments de la secu, sens l'anonciar jamai, e que l'esquèrre ela passava lo temps per dire que pòdia pas far coma dich , e que per començar calia pagar mai per la secu per exemple.... Mas qu'un jorn; bel temps mai tard, luenh dins lo temps, dins l'espandi de la creacion, d'un avenir ròse se pintraria se ren n'entrepachava la capitada....
Enfin de nos bastir un estat moderna francofonaire d'a fons a cima, e que lutjaria sus l'estrada mondiala, de rotlar sos muscles, contre los paures cansats, atalentats, estavanits, que trabalhan 12 oras per jorn per 2 euro.
Mas que podem èstre fiers!
Enfin d'un biais o un d'autre i arribarem , e lo governament pòd n' èstre orgulhos, merce d'una politica coratjosa, que los necis paures e simples trabalhadors podon pas comprendre, quand los beneficis del CAC 40 passan dins l'estrambòrd general e, enfin lo cap dels 100 milliard d'euro.
Un còp d'èstre fier d'èstre français se o sem. E d'aver votat per Nicolas per los qu'o faguèron...E que vesem pas pus ara ont anisan....
Tanben sem al punt onte cal pas pus se rescondre darrièr l'ombra de son dèt, cal gausar dire quicòm mai.... Mas de que ? E ben me pensi que cal passar al virament automatic, que per exemple , se donaviam nosautres e cada paure ambe nautres tanben , pas que 30 euro a cada ric, per mès e ben los veiriam uros, los rics!.
Cercatz pas n'i a un près d'en çò vòstre.
Una mena de questa pietadosa de pagament regular per los grands malautes de l'argent... La continuitat , perena, ciutadenca, durable , responsable, hulòtesca que!

Que disètz ? Qu'i an jà pensat? De segur mas l'escòla m'arrestèt lèu... Qu'èri pas acapriçat d'aprendre... E Oc que me cale? Oc ben , avètz plan rason Monsur . Que torne set còps la lenga? Se volètz ...

Aital daissèri tombar de trobar d'idèas per enriquesir los rics o far lo gauch dels paures...
Alara que cadun s'acantonava suaudament aprèp Pascas, vaiqui que recebèri la carta postala aici dessus, de sab pas qual pauc val, carta qu'al revèrs disia:

- aquela carta l'ai recebuda ièu tanben, (e ara l'as) d'un preire de l'Amazonia que me l'envejèt dabant de morir de las fèbras. Se sonavi Delrandal e demorava dins la tribu indiana d'Aroncesvals, un canton prèp del Rio Negrò e parlavan françès coma de Bascas mandchon. E me diguèt que me :"calia l'envejar a dètz autres legeires e qu'aital fasent , devriam capitar d'emoscalhar un maximun de monde ... Senon e ben crebariai de segur de la meteissa malautia òrre, que far als uèlhs rajar una sang vèrdassenca e escupir de mots estranjas dins la lenga de la Molièra*? quand sètz a mand de prendre lo camin de las lausas?. Qu'al revèrs que prenga lo temps d'envejar lo messatje e ben que , crebariai pas coma un conilh dins un valat en bolegant las patas de darrièr a l'abroa d'una rota?, o d'aver minjat un lusèrp que per cas me trapèssi, o simplament al Mac Dò un jorn autanenc...
E d'oblidar pas coma un bon milierat d'ases estabordits l'oblidèron de far lo gèste que salva!
Alara sètz liure ara que sabètz . E espèri per vosautres que saurètz prendre la bona draia!!!


La "Molièra" es un luòc prèp d'un ribatèl onte se pòd pescar la trocha e ont se rescontran de pacans dels quals disiam que "parlar françès coma los de la Molièra" Mas del costat de las Ginestas es çò mème. Per dire ...

lundi 24 mars 2008

Religions:dos mila ans de malastre

Cal festejar Pascas, mefi es pas question de Pasqua l'òme dels Nauts de Seine, l'ancian ministre del dedins. Non Pascas es a dire la fèsta de Jesus , envejat de Dieu sus Tèrra per se cargar dels pecats dels òmes, e nos desliurar de las cadenas umanas , que nos emprisonèron tre la sortida de l' òrt d'Eden.
L'istòria dis que Jesus moriguèt per nosautres entre dos criminals . L'istòria dis tanben que se'n morrissian un fum a n'aquesta epoca . La Palestina èra pòblada d' òmes estrambordats de religion e qu'esperavan de longa de veire de Messis. E ne'n vesian de pertot.
Jesus l'envejat de son paire nos suplicèt (nos amenaçèt tanben)d'escotar la paraula divenca e d'asorar Dieu.
Perqué?
Ja tot pichon me demandavi qual èra aquel Dieu que nos avia metut sus la Tèrra tant val dire liures , mas tenguts d'ondrar ser e matin la paraula de Dieu. Consi avia pogut nos pastèjar a son imatge e nos dire liures de far nòstre biais. Per qué demandar asorança, e somission?
Que se volia de l'asoracion! E ben la calia semenar tre la debuta entrò la fin dins caduna arma non?...
Mas non. Lo preire s'acanissiava. Les òmes son liures de far lo mal e devon causir de far lo ben. Qu'al jutjament darrièr, alara Sant Peyre destrigara los missants dels bons e los que seguiguèron la lei de los que s'en chautavan..
Pascas la renaissança d'entre los mòrts, e l'avaliment d'un mòrt sabon pas ont?
Mas l'aiga passèt jos los ponts de totas menas. Legiguèri de pertot las istòrias de chaplas, de fach l'Istòria qu'òm estudia tre l'escòla mairala, e Diu sab consi la França n'es fièra de totas sas batestas. A començar per la del païs de las doas mars e de las tres montanhas: l'Occitania . Lo pretzfach de la gleisa d'escantir nòstra civilisacion , de recaptar las armas perdudas, ambe l'ajuda de saquejaires , e de lor donar los bens, omes , femnas enfants e tèrras, per los pagar, als criminals ambe la promessa, a mai de se ganhar lo cèl. Innocent III(lo plan sonat), e Folquet de Marselha dos sègles d'Inquisicion aici , e per seguir d'autras crosadas dins Palestina (e lo canibalisme dels crosats qualquas còps) , e encara la mòrts de millions d'esclaus entre l'Africa e l'America , e las civilisacions d'Indians treboladas, e las guèrras encara e totjorn , e la Shoah, gaireben totjorn per causa de cresenças diferentas.
As pas lo meteis
Dieu que ièu? donc m'en vau te tuar.
Qu'es pas possible dins lor cap, qu'i ajesse dos o tres Dius.

D'unes de nos prechar l' obra civilisatrica, amadurada entre los sègles dins las abadias; la grandor de l'Occident Crestian...
A pro pena lo fanatisme crestian s'atudèt , aquò's lo de l'Islam que prenguèt la perga, e de far petar las bombas de pertot. Chiites , Sunites , Al Qaïda. L'Afganistan vengut la Tèrra de l'opium. L'Iran , l'Irak e l'Arabia Saodita... e totas enlucernadas e seguras de sas paraulas divencas.
Los quites Josius qu'avian tant patit entre la seconda guèrra mondiala i venguèron tanben e d'escanar los Palestinians. An bastit una paret per s'aparar que dison mas , de verai per tòrcer un pòble qu'en pòd pas mai.
Los Taoïstes Japonèses entre la darrièra guèrra que menavan los Chineses o los Coreans coma de bestial que los cresian de jos-òmes...
Solide, tot compte fache e rebatut las religions son un fracatge.
Benlèu que Dieu nos oblidèt completament? Que saupèt pas nos adobar coma cal? Aviai plan dich que l'idèa de crear d'òmes per que se plegar a la sia volontat e poder ganhar lo Paradis èra una idèa un pauc falorda.... Benlèu que n'a un sadol dels òmes...
Mas baste que lo XXI èma sègle quite completament d'èsser religios , vos ne'n pregui........ .

vendredi 21 mars 2008

Francofonia

PintraduraAF. dreches servats
A las bèlas; al cap de la carrièra Bayard , que mostravan son sen sens que degun se ne trachèsse. E nos disian nosautres, bèls e cons a l'encòp, en marchant cap al "Telegrama" , qu'i avia pron de filhas al monde del bornhon. Qu'avian pas besonh de sortir lo porta-moneda, per nos acontentar, que las filhas descabestradas d'alara se donarian cambas e braçes per dessus, sens pagar. E oc. Nosautres los tabans de la nuèch , pintrats dusc'al uèlhs, pintats , embriagats, negres, coma los Polacs a las sasons de las vendemias...
Mas que las filhas èran pas gaire nècis. Lor'n calia mai per las desturbelar.
Los "Beatles" cantavan "Yellow Submarine" e me'n chautavi de l'occitan coma de la prumièra camisa.
La carrièra lusenta la nuèch. Que siague jos la pluèja , o que i aja lo lum dels faras , que furgavan los trepadors en cercar d'una Lili.
Tot cambia e tot demòra.
Levat los pelses al l'estage dessus.
L'ai rescontrada al caireforc de la mia vida. Cercavi pas mai qu'un pauc de sosta coma un aucèl espaventat , per s'aparar de l'aura. E l'aviai pas vista, estanta, que s'acantonava dins lo recanton d'una pòrta escalprada d'un temps que los òmes aimavan lo trabalh de menusaria. Ela esperava la pratica. Mentre que ieu escotavi los bruches curioses que montavan del mèu estomac. E que me tafurava l'idèa de vomir. Subretot ont? Sens trapar la vergonha. E que me trebabla qu'una filha polida, mièja nusa a mai, aja lo plaser de me veire me sortir los tudèls en cridant com'un corbatas ...
A un moment me demandèt de fuòc . Per astre, èri a mand de quitar de tubar, per la novenca fe, e que sarravi lo batifuòc per me sovenir de pas oblidar... de daissar la pipa e de tubar ... que d'uns còps arriba.... d'oblidar.
Aluquèri la flamba ..... de l'amistat. E partiguèrem beure un còp d'un bar bòrni al canton de la vanèla, onte la Lili tenia sas dintradas. Pus tard me diguèri que n'i avia un fum de Lilis, blondas , brunas, castanhencas e totas mièja nudas. Lo patron m'agachèt auturos. Una palomba blu se diguèt sai que un duganèl. Non pas tant qu'aquò mas un vertadièr papagai. Atraversèri lo membre per trobar d'escampar d'aiga . Rotlavi las espatlas. M'agachavi dins los miralhs esclairats de lumièra vèrdas e rojas.
Mas quand passèri la pòrta trobèri de qui parlar. Coma òm dis al rudbi :"qualqu'un m'atudèt lo lum."
Dempuèi aquela sornas istòria , m'agachi pus marchar. Gaiti los autres .
Me revelhèri a Purpan sus un baiard.
Era la prima e las colombas roconavan sul davant de la fenèstra . Una infirmièra dintrèt. Revertava exactament la Lili que seguissèri un còp, dins una autra vida , dusca z' un cafè escur empudentis per las odors de fritas e de molas.
Era la prima, mas me diguèron la familha, que defòra, de longa plovia.

mercredi 19 mars 2008

ficcion -capitol 1






La Sofia a l'esquèrra



Lo pus penible dins l’espandi intergalactica, aquò‘s pas lo languiment, ol’alunènhament dels amics de Luna-VI. Encara mens , coma se podria imaginar lo plaser rare de minjar la garbura, jos una trèlha una serada d’estiu recompausada,, o un cassolet reial del mièjorn, pas pus que manca lo spectacle de la vida o lo besonh de badar « in live » d’artistas de passatge dins lo vilatjòt de colons davansièrs,, o al nivèl basic ambe umilitat lo d’un brave match de rudbi a la television. Non lo pus penible aquò’s de costejar de longa , l’autra omnipresent , de s’entremesclar de contunh ambe sa presencia pesuca, de crosar son ombra espèssa , la d’una copilòta causida per la companhia quand òm sentis al dedins de sèu, l’envèja de la tuar. Disi pas que i a pas de còps que capitèssèm pas. De còps oc que s’afrairan , que s’aparèlhan tanlèu disns lo vaissèl a la lèu lèu,, entre nosautres los solldats calfaires de fusadas que carrèjan de pertot las riquèsas dels univèrs colonisats. I a d’unes còps de filhas bravas, plan adobadas, e de segur plan agradivas causidas coma cal per la companhia.

Mas cal dire que, malgrat la formacion a la solitud , los mèses passats dins un caisson jos cent mèstres d’aiga , al silenci , malgrat la lobotomia leugièra e passagièra dels nervis auditius , l’ adaptacion a la psicologia conhitiva, lo domdage del subreièu, l’estagi longaròt de gestuala comportamentala , l’adobament e la causida informaticada d’esperits afrairats o suspausats tals , capables de s’amicordar, fraires o sòrres e d’un biais, mantuns còps preformats(a l’estade prenatal) a la vida gregaria, e per acabar, malgrat l’ajuda plan importanta de la qiromancia,, lo tiratge de las cartas,, los concors del manhetisaires e fachilièrs de totas mena sens comptar los disaires de bona ventura , sòcis totes de la confederacion de la societat operacionela de devinhaires professionals,, arriva mantuns còps que siaguèssen opausats, d’a fons a cima e tot aquò, tre la debuta, i a de còps que nos podem pas endevenir e qu’avem envèja de nos estripar.

Un exemple : la darrièra mission Aldebaran, que s’agissia de portar tres mila tònas d’uranion pel compte del ministèri de l’ecologia… Brèu una mission tot çò que i a de mai aisida,, quasi de rotina que. E de qu’’arribèt ?

Un malastre a las doas patas que se sonava Sofia . Per dire malastre sai que lo mot me pareis lèugièr uèi, e inadaptat , même siès mèses aprèp de n’èstre sortit per pas dire escapat …… viu…

L’entama jà falsa , lo primièr jorn , un malastre.Los agaches asirencs. Per dire èran a pron pena passats dins l’iper-espandi , a la celeritat supraluminica , que te vèsi pas la Sofia arribar dins la mia cabina tota nuda. E de me dire subte d’un èr trufarèl:

- crèsi que cal n’aver lo còr net, sul pic.

- mas de que ?

- de far l’amor sul ponde en lebrèta te… Es aitail que fau ièu. Coma aquò òm sab de que i a al nivèl del cap , e de las … figas

- de las figas ?

- pesuc lo tipe… te disi donc que nos cal sul pic , tombar la camisa per veire la compatibilitat corporala e tant val dire umana. Diga me . me sovèni pas. Sias de qual sinhe tu … Crabe crèsi…. Ai iai iai ..

Vejèri « sul pic » ièu tanben que la filha avia pas cap de saber viure e encara mens d’instruccion. Lo manual disia plan que :

- capitol 1 pagina 112 . L’òme dèu menar los preliminaris… referéncià a l’amor cortès ?

- Capitol 2 pagina 153 alinèa 3….qu’es recomandat d’esperar lo primièr tèrc del viatge per s’acontentar (s’òm pòd). Parlavan pus luenh dels besonhs de la natura umana … e que de tot biais aquel recuèlh de nòtas tenon pas cap de caractèris obligatòrias ; son juste de concèlhs.

- Capitol darrièr …. que la femna pòd totjorn crompar lo modèle de « godemitoy » tipa extrasensorial sonat endacòm « lo vali plan» o encara « viatge celestial sus l’esquina,e al rebors » , en venta dins totas las grandas susfacias de l’univèrs conegut.

Sus manual èra encara escrich :

Per cas de malvolenças de l’un o de l’autra, per cas d’incompatibilitat i a ultima secors, ; al quatren pont , lo membre per la gimnastica e los ròbots per l’igièna sexuala…

Alara , quand comprenguèri qu’anavi passar siès mèses clavat ambe una bèstia sexuala e crudèla, manquèri de petar un plomb.

Soi puslèu « gametoy ». Li respondèri missantament que :…… i avia una fugida de liquid caloriportaire e que calia benlèu se rebrossar los margues e las bragas per i anar veire.

En realitat diguèri solament :

- S’ioplet Madomaisèla d’ara enavant vos pregui de tapar la pòrta dabant de dintrar dins la mia cabina….

Coma te la rebotèt a sa plaça la canhassa. Rebrossèt camin en bufant ; e mormolhèjèt !:

- qual con !!!

L’escriguèri dins lo rapòrt , mas que soi pas segur d’aver ausit aquèla insolençia.

Per dire l’atmosfèra venguèt firrespirable aprèp aquela dintrada en matèria. …

Per dire tanben que d’unes còps la Companhia s’engana d’a fons a cima. Tre la sortida de l’espandi iperluminica , capitèri de sonar los responsables del centre de Luna VI e sabètz ço que me respondèt lo Comandant dels Transpòrts de la Galaxia Nòva, la famosa CTGN . Lo comandant Vertilhon en rifanhant d’un rire gromand :

- e ben Bob ( me sòni Albert Beaufòrt) dèu pas te laguiar ambe la femna que t’avem trobada coma copulòta ambe tu tot sol…A A A…

- çò just mon comandant qu’aimariai de ne parlar …

- escota Bob es pas la pena de’n parlar qu’aici totis sabem…Avem tot ausit. Ta musica es passada en bocla dins totas las basas de la CGTM. Ne lhabravan d’envèja .. Manquèri de m’escanar…

- de que ?

- que nos envejèt l’enregistrament la Sofia…

- mas que ?

- que faguèron una bèla ……. Copulacion. Un polid cople …… al lièch…Ajes pas de vergonha que totis aici n’escotavan sens alenar e que te sias bravament escampat.O sabiai pas de tu…

- mas non…. oc diguèt…

- ane…profitètz de la vida los joves , sas que , se sabias coma regrèti las missions d’un còp èra … pichot benastruc ane…Quna malanconia quand même ! Seguida se volètz







òm me sinhala que sus un païs endarrièrat de la Tèrra , n'i a encara una tribu que vòl pas ausir parlar de la lenga d'una pichòta populacion que parlaria Occitan . Aqui çò que ne'n dis l'envejada especiala de lONU.
Une vergonha dempuèi de sègles... Legir ci jos. Qu'es pas de creire

La réponse de Madame Gay Mc Dougall, experte de l'ONU

Avenir occitan

Tolosa la bela cambia de capmèstre, e Mureth tanben, e un fum d'autras vilas endacòm mai. Sera divendre per nautres. Tot va plan. Aquò's la primièra lei democratica de respectada , d'eleccions liuras, sens tròp d'enganas , levat qualques butletins dins las calcetas del costat de Perpinha. Solide que devian impudentir l'èr aquelses papièròts. Encara uros que los metèsse pas dins las calças.
Oc tot va plan. Levat totjorn aquestes teles e autres medias publics, es a dire pagats per nosautres, coma Frantz Kultur que nos mesprèsan , nos inhoran e cridan sul pic a l'unitat nacionala amenaçada tre que las lengas minorisadas grelhan a pron pena , tre qu'ausisson un mot nòstre, çò qu'es totjorn lo cas segon elses en 2008 qu'es praquò 'l'Annada de las Lengas" e tot aquò coma de ressas ,dempuèi que nos an saquejats al sègle XII.
Tot compte fach e rebatut las resultas son mejanas per nosautres, al vist del trabalh de cadun. Mas qu'avem fach de bruch , mai que de costuma . Amassada bela a l'iniciativa de convergencia occitana ambe totis los candidats per Tolosa, establiment d'un programa adobat pels candidats principals. Debat sus radiò occitania, jornada occitana de l'Octan e de la calandreta a Murèth ambe l'ajuda del POC , dictada e bal e animacion de mercat . Sinhatura d'un programa tanben dins la linha del POC...
Malaisit de devinhar nòstra avenir.
Los jornalistas nos dison que las finanças mondialas son pas bonas . La Despacha explica çò que nos va costar. Prètz d'ostals a la baissa , pensions rosigadas per l'inflacion e los retards d'aumentacion, descas de la menagèra mai caras, e caumatge creiscut . Los savantasses que nos prechavan de longa per la lei del mercat , las delocalisacions , la superioritat del capitalisme, del liberalisme , de la lei dels mai fòrts, e son evidencia eternala sus tot autre sistème, ara se calan un momenton o cambian de cançon.
Aièr se'n ausiguèt un de la còla de Minc, l'ex director del Monde, que diguèt que : cal saber nacionalisar se tot lo sistèm bancari se troba amanaçat per la crisi americana de "subprimeses"; ajustèt: "il ne faut pas rougir". Pareis que lo Blair, que nos repròcha cada còp que se passa per aici , d'aver"mancat lo viradis" liberal " nacionalisèt una banca privada, qu'avia "realisat" un brave deficit de qualques milliards d'euro. Que nosautres tot aquò nos arribara pas. Avem de joièls de banca coma la "Societat Generala" que lo monde entièr nos envèja.
A Nio Iòrq los umanistas, plan coneguts, de la banca Morgan venon de crompar unas de las quatre bancas mai belas de Wall Street , donèron 250 million de dollar (una misèria)per una afar que n'en valia 25 milliard n'i a gaire , (simple l'accion val 2 dollar alara que valia 140 al mès de novembre 2007).
Sem donc alara al moment ont lo Capitalisme Casino demanda a l'Estat cropièr, lo remborsament de sas perdas a la roleta. Una mena de securitat sociala que! Seria risible se los revenguts(salaris e pensions) dels paures èran pas considerats coma una "variable d'ajustament". Dins d'article pichons la premsa sinhala que 52% dels françèses devon d'argent al nivèl de 62,6% del revengut disponible, punt lo pus naut dempuèi 20 ans.
D'autres savants qu'an estudiat las crisis dison que de costuma , una crisi dura pas qu'un parèlh d'annadas, mas qu'aquel còp belèu sera lo doble. Donc cal sarra las dents lo temps que l'estat aja lo temps de tornar donar fisança e nos d'argent als propriétaris del monde.
Coma diguèt un còp èri Jospin als Michelins o Sarkosy als Usinors de MetalXXX : l'Estat a pas per vodacion de se trachar de la gestion de las entreprèsas.
Levat que quauques còps o cal far e malurosament , cal tornar o plan contunhar de molze los paures...
Bona novèla un economista famos concluèt:
"d'accòrdi es una missanta passa , mas d'un autre costat , i aura lèu d'afars miravilhosament chucosas de far, per los qu'auran un pauc de coratge e...................................d' argent".
Conclusion "PAURE TEN TE PRESTE"
e un avertiment "E ven pas te planger se demòra paure e con coma la luna.."

lundi 17 mars 2008

Vergonha e Charta de las lengas minorisadas

A drecha lo lògò per l'annada de las lengas de l'UNESCO------------->>>>>>>
(liure d'emplec).


Lo 7 de mai 1999 aqui çò que lo responsable françès escrivèt al secretari general de l'UE a prepaus dels plens poders per la senhatura de l"instrument"... Podètz trobar l'original del tèxt a l'adreiça d'EBLUL:
E dempuèi res de cambiat
Per resumir en lenga clara çò que diguèt l'ambassador de la republica de las letras mòrtas...
En italic d'explicacions complementaris que l'ambassador françès se servis d'una lenga que degun pòd pas comprendre sens de legir très cò
ps.
**************************************************************
La republica françèsa pensa de formular dins son "aplech" de ratificacion de la Charta euròpenca de las lengas regionalas o minoritarias la declaracion seguenta :

dins aquel article 1 lo tipe dis que s'a pas tot comprès , de tot biais lo tèxt pòd pas èstre contrari a la constitucion.
1. Dins la mesure ont se cerca pas a la reconeissança e l'aparament de minoritats , mas de promoure lo patrimòni lenguistica euròpenc , e que l'emplech del terme de "grops" de parlaires dona pas de dreches collectius pels parlaires de las lengas regionalas e minoritarias, lo governament de la Republica compren la Charta dins un sens( que pòd pas prendre ) incompatible ambe lo portisson de la Constitucion, qu'assegura l'egalitat de totis los ciutadans dabant la lei e conneis pas que lo pòble françès , compausat de totes los ciutadans sens distinccion d'origina, de raça ; de religion.

Dins l'article seguent lo tipe dis que tot biais lo françès es la sola lenga reconeguda e utilisada.
2. Lo Governament de la republica compren l'article 7-1 paragrafa d, e los articles 9 e 10 coma pausant un principi general, que va pas (comprendre :que pòd pas anar) al revers de la constitucion segon que l'usatge del françès s'impausa a las personas moralas de drech public e a las personas de drech privat dins l'exercici d'una mission d'interest public tant qu'als usatgièrs dins lors relacions ambe las administracions e servicis publics.

Dins aquel aticle lo democrata françès compren que l'occitan demòra facultatiu.E que los regents devon d'emplegar lo françès
3. Lo governament de la Republica compren l'article 7-1 paragrafa f , e l'article 8 en aquel sens qu'aparan lo caractari facultatiu de l'ensenhament e de l'estudia de las lengas regionalas e minoritarias , tant que de l'istòria e de la cultura que son la dicha , e qu'aqueste ensenhament a pas per pretzfach de levar d'escolans escolarisats dins los establiments del territòri dels dreches e obligacions aplicablas a totes los usatgièrs dels establiments qu'asseguran
lo servici public de l'ensenhament o n' i son juntats a elses.

Dins aquel article lo tipe dis que los actes devon èstre escius en françès.
4.lo governament de la Republica compren l'article 9-3 coma se podent pas opausar a çò que sola la version oficiala de lenga françèsa, que fa juridicament fe, dels tèxtes legislatius que son renduts vistables dins las lengas regionalas o minoritarias poguès esser utilisada per de personas moralas de drech public, e las personas privadas dins l'exercici d'una mission de servici public, tant que pels usatgièrs dins lors relacions ambe las administracions e servicis publics.

samedi 15 mars 2008

Dos blocs senon res.Umor. Amor ça mème.




L'AFP comunica:
Entre los Blus e los Jaunes dialòg impossible...
Dins França i a pas pus que dos partits. Los jaunes e los blus. Los jaunes que dison que cal trabalhar sens renegar. E los blus que dison que cal pas renegar lo trabalh. Entre elses aquò's la guèrra. Un dels dos partits es cargat de fornir d'òmes a l'autre. Es coma un jitat de toca-manetas dins un sol sens, e sens fin.
Lo president bredonejèt un jorn: vai t-en paura colha. E lo cap dels blus; Monsur de Nederland gulèt com'un gal :
-"es aquò que me parlas, ieu que quiti pas de t'adobar los melhors...
me fas cagar tu, pren te aquel Kouchener dins la cara ...
atencion que senon te fili Allègre pels passes, lo caçaire de mamot sabètz...
mas quitaras pas de me petar las bregas tu? Te l'as aqui Besson e se contunhas t'escamparai Lang e Rocard.... De que? Mila Diu e ben veiras plan quand los auras de longa per las cambas.... Non m' as pas fenit d'insolentar lo monde trabalhador....
E..... quand tot vira mal e que lo ton s'enauça....
- t'avias dich de pas contunhar aital e ben non , contunhas e ben l'as aqui l'Attila ; non l'ATTALI; m'estonaria que rigolèsse. Que te'n vas te comprendre ta dolor...
Co que fa que l'UMP, e lo PS sabon pas ont penjar lo lum.An format un partit qu'esclafa tot coma un mamot.
Aquel novèl partit dos en un, comme per la bugada, se sona l'UMPS. D'unes crèson que i a l'UMP d'un costat et lo PS endacom mai, e ben non s'enganon. N'i a pas qu'un que se sona : L'UMPS. Savètz un pauc coma las veituras GTS(gara te sac a m...). Aquel partit jaune caca-d'auca garrelèja de s'establir. Mas ara pren fòrma. A lo cap a Paris e nos caga aqui dessus a Tolosa.
Dimentge lo PS (basta que ganhe un fum d'ostals de comuna); mas qu'es totjorn lo meteis problème: es que l'UMP es prèste d' aculhir totis los òmes de la dubèrtura? Los candidats als pòrta-fuèlhas? Coma cal los recebre los revira-vestons... UN drama l'UMP pòd pas fornir per totis , i a mai que maites UMP qu'esperon de plaças, dempuèi d'annadas, qu'i èron ja a l'UMP,e que d'un biais braman:"prioritat a drècha naturala; mas se tròba que lo rajal dels PS non jamai s'estoris.
Que deman lo PS ganha e i a un fum d'òmes de casar.
Que l'UMP ganha e i a pas pus de plaças.
Consi que nos revirèssem , nosautres los caumaires de basa vesem pas consi ne sortir...

A Roma lo Papa diguèt tristament :" Senher Diu; agatchatz pas los pecats de la tia gleisa mas pensatz a l'OCCITANIA".
Baste que lo Moudenc e lo Cohen i pensen. Mas en aquèsta annada de Lorda , de las aparicions de Bernadeta, me sovèni pas que lo quite Doste, o lo Baudis i pensèssen un jorn...



L'AFP le 15 de març que marçèja.... En direct de Radiò Bordaiò

vendredi 14 mars 2008

poèsia falorda del sègle XII


Tolosa seria venguda rebella
Per un joine que se fara bela,
A metre de ròsa de pertot
Tolosa se pintrara las brègas.
E se tancara boca dubèrta
Nuda a totes los caireforcs
Tal una puta se passèja
Sens voler dubrir son còr
Un pauc de roja, un pauc de blu
E lo cèl que s'escartaira
Entre quatre chaminèas.
Talas quatre espinas aparadas.
Qu'aparan lor poison.
Quatre vies plegats per amor.
De la bestia pudentissima.
Ieu me'n torni al mèu ostal.
Son còr me volguèt pas donar
Per doas figas cansadas .
L'òme prepausa , de son caval
A la femna una balada.
D'una riquèsa que trobara.
Entre un ivronha aroïnat
E un notari que trantalha.
L'escuch es perdut al pè
d'un lièch que rend l'ama .
Estavanida sens plaser
Deman se diu vòl a l'alba;
Lo solhèl nos escupira
Son gaug e las lagremas.
E totis cocuts cantarem
Dins nòstra prada lo repic
de las paraulas franchimandas.
Entre un pibol que tinda
E un cloquièr que floris
Es aital qu'aqui virarem
Sens rimas e sens rason
De Trucas Lunas en cançon;
L'astre negre del falorditge;
Butadas a las règas las granas
Sècas de l'oblid davant
Un grand treboladis.

mercredi 12 mars 2008

Un conte per dormir

Quand èri nen

Quand èri nen e que la maire m'envejava a Milhau per passar la setmana tot aquò m'agradava pas tròp . Que non venia, pas la paur de la grand o del pepin, que non , la paur arrivava quand devia davalar o montar los estages dels fotrals ostalasses ont estajavan elses.
I avia la paur del jorn.

La paur m'acuòlava un pauc dins la jornada, se lo pepin me comandava de davalar l'escalièr estrèch de la cava , que virava e revirava dins una torre òrre, dusc'en bas , sai que aprèp un centenal de grads a susar e se trigossar, e qu'i fasiai a paupas dins l'escuresina per pas cabuçar.
Me sovèni pas sonque de que m'envejava cercar lo pepin. Me soveni al revers de la mia pèl que se rebrossava entre que cercavi d'endevinhar se la causa infernenca anava me trapar pel cap o pel cuòl.
Aici en bas , lo pepin salava la charcutalha, cambajons ,ventrèscae autres porcatalhas. Un còp per setmana i me calia anar amb el , que bufava, mentre que ieu me disia de longa que me prenia perqu'avia paur de la causa ; el tanben.
Aqui donc la paur ordinaria del jorn , la que dona un pichòta caganha leugièra mas testuda, sens res pus que de missantas nolors, caganhas autoalimentadas d'un biais per lo passatge frequent als comuns , per la rason que lo cagador se rescondia en contrabas de la dintrada del escalièr infernenc emplenat d'aranhas sauvatges . Que ne'n sortia en gulant com'un ase sens que lo pepin comprenguèri jamai de que se passava. E la grand disia:
- Terre Aime(lo prenom del grand) daissa lo tranquille aquel dròlle ... Qu'i fas paur
Que lo pepin renegava:
- M as que comença de me conflar aquel bramaire. I fau pas res a n' aquel mecut.
E puèi i aviai la paur de la nuèch.
Que dins aquel temps , sens tele lo monde i fasia segond son sicut. Lo pepin aimava de legir lo roman de l'aiga de ròsa del Midi Libre entre que la grand cordelava . E lo ser arribava dapassèt. Clavelavam la carnasaladaria e partissiam sul baloard cap al pont de Cureplan . Aqui totis los sèrs. Las cambras se trobavan al tresen estage d'un imòble polid mas el tanben escur. Mas coma i avia la grand e lo pepin , m'asseguravi, me disia de longa , que la bèstia , se n'avia una dins un canton mancaria pas de lor minjar a elses qu'èran plan mai grosses que ieu.
I avia pas sonque qu'una ampola frèula per esclairar tres estages d'escalièrs. Lo grand asiriva de depensar l'electricitat e n'i fasia una guèrra aspra , entre que ièu passava mon temps de virar lo boton dins cada membra ont passava. Per paur.
Lor cambra èra al cap d'un corredor. La mieuna de l'autra band. La grand me contava totjorn una istòria polida , d'enfant bravas qu'escotava plan , que se dormissa lèu dusca'l matin çò que donava drech a una ponhada de bonbons, lo meteis matin de segur.
Me soveni d'un còp ont una envèja d'escampar d'aiga me tarufèt, una brava orada tant que me revelhèri. Calia plan se levar. Mas se levar èra ça mème que de marchar a la mòrt , davant la bestia feruna e pudenta que m'esperava coma la morena o far de la sarda. Alara me levèri docament lo cap, sens alenar, en gigolant coma un caton una nuèch de prima. E m'alisèri sus la flaçada cap al topin blanc esmalhat en espiguant la nuèch nègra encara tot reboistorat . Ausiguèri los bruchs sords del trafic sus baloard. Vejèri pas venir la rescontra d'una fòrma blanca qu'arribava tal un liaç drèch sus ieu. Aluquèt lo lum la fòrma.
Era drècha , dins sa granda camisa de nuèch blanca e ambe sa boneta que li minjava tota la cara, e li amagava los pelses. Comprenguèri lèu que la darrièra ora èra arribada. Que lo grand Molinier de la Mòrt m'avia devinat e que minjaria pas los grands , mas ieu d'en primièr , que devia èstre mai gostos.
Cridèri entre que la grand ensatjava de m'apasimar en me quichant contra son pitre. Tròp tard una sompa s' espandissia sul ponde ; sens que poguèsse tampar la sorga. Era pas de sang , ni de vin. Ni d'aiga o que non, que tot venia de la mia canèla.
N'ajèri tant paur que volguèri pas pus dormir de la nuèch e encara mens ambe la grand.
La paura ela diguèt sens relambi:

- baste que siaguèsses pas malaute pauròt que ta maire me cridara !
Ieu l'escotavi sens poder quitar de gaitar lo corredor onte una bestiassa negra volontava d'escotelar lo pissaire qu'èri vengut e que capitava d'amagar la sia paur.
Espiguèri tota la nuèch dusca paresca l'ombra clara de l'alba.

mardi 11 mars 2008

Lautau


Lautau

Meçieu le dit-Recteur,
Dé reçourçe Zu Maine,
Ke mon mo coure à vou,
Com’ un énergumaine,
Sang évéié vautre courou,
Mé çà fé mal o keur
Meçieu le dit-Recteur,
Vou ète liçençié,
Avé tou lé copin,
Vou nou avé çié,
Vou touché le paké
E eu i z’oron riain
Je le regraite biain
E çà fé mal o keur
Demin i ziron travaié
An Chinoeud pour montré
Ke nou ossi lé Michelain
Kon poeud bocé pour riain,
E vou oré le droa
Meçieu l’oeu dit-Recteur
Dé ressoursses Du Maine
De suçotté un naime,
An gise de fesse-tain.
E çà fé un poeud peur
Cé pa le toutou çà,
Y fo que je vou kite,
C pa la queue geabite
Gé ganié o lautau,
1 saqré cou de po
Je vou done ce chaike,
Je voaiaje bocou,
Jé visité la Maique
E m’aime Catmandou
Oçi je pansse à vou
Je paçeré vou voar
Si vou ète a Pékin.
Caume vou le vouaié
Je m’essuie adapté,
O monde mon dialysé.
Mé ma min sankulose.
E ge cèçeré là d’écrir’.
O Fon ge vou plin biain.
E Vou me fête biain rir’,
Noeud le prené pa male.

dimanche 9 mars 2008

Lo drech de parlar

Adiu totis;
Aqui dessus los morts occitans de Mureth per l'annada 1916 . N' i aguèt tanben sus las tres autras costat del monument. Son 50 sus aquela facia . E qual se soven d'elses? Quand de respect tenon per lo sacrifici? Ren o gaireben.
Nonantes annadas aprèp , nosautres vos saludem.
N'i a encara un molon d'autres , per las guèrras de 1939 , 1940 , per l'Indochina , l'Argeria; Madagascar , Tunisia, Rif..... E vòli pas parlar de l'aventura napoleonenca.... E de totas las autras.
Totis aquelses morts o gaireben parlavan occitan , Oc ,Gascon , Lengadocian.... eca.
E coma o diguèt la plaqua de maubre tot en bas . Son "Morts per la França".

E endacòm mai, degun gausiguèt pas d'escriure: qu' amenaçavan l'unitat nacionala que moriguèron per la França tot en parlant la lenga d'OC. Degun lor diguèt pas :"tu vai-t-en que sias pas françès coma nautres" Parla pas coma cal. Non al revers lor diguèron : " vosautres se volètz mostrar lo patriotisme aquò's lo moment d'o far "
Non moriguèron per las valors de la libertat , de l'egalitat e de la fraternitat.
Alara a totis los parla-ponchuts qu'auson de dire en facia d'un tal sacrifici que uèi , nosautres los reires enfants d'aquelses òmes; sèm dangeiros per l'unitat del païs .
Coma s'ausis mantuns còps.
E ben ièu tròbi pas mai que de dire que , s'es aital, de segur; que ne'n volem pas pus de viure a costat d'elses. per qué fan la prova qu'aquel païs es pas cap democratica, e que ten aqui un ròtle de colonisaire . Pas gaire de democracia . E que los aujòls moriguèron per ren.
Qu'aquel païs son que pas , al nivèl de l'ex URSS, que ven de legir que lo Quirgiz pòdra lèu tornar parlar la sia lenga , pròva qu'ela subreviuguèt entre 100 ans de comunisme, alara que la nòstra es a mand de morir, escanada aprèp sonque 5 republicas.
Avem lo drech de parlar en çò nòstre qu'avem pagar coma un bail , a l'encra roja del sang , e benlèu qu'avem pagat mai que los mèstres , ambe los Corses, los Bascs , los Catalans, los Bretons , los Creòls , los òmes de l'armada d'Africa, e sai que mai que los franchimands, qu'avian l'astrada de viure dins de ròdols industrialisats, necessarias per far la guèrra.
Alara amic occitan cal quitar sa vergonha e parlar naut. E demandar sens tremolar lo drech qu'es nautre.

samedi 8 mars 2008

United Nations Educational, Scientific and Cultural Organization | Culture



Monsur Koïchiro Matsuura escivèt:

Messatge del Director general :"2008 annada internacionala de las lengas"

L'annada 2008 foguèt titolada Annada Internacionala de las Lengas per l'Amassada generala de las Nacions Unidas. L'UNESCO , cargada de n' coordonar las activitats , volonta d'assumar d'un biais resolgut son pretzfach de cap de còla.

Aici un mot sus las traduccions existantas. Per malastre l'UNESCO nos donèt pas l'occitana.
Jo aladonc o foguèt. Per melhor que poguèri.



Aqui lo text....tradusit

L'Organisacion est perfeitament conscienta de l'importancia cruciala de las lengas vist los molons d'escomesas que l'umanitat devra s'afrontar entre las decenias venentas.
Las lengas sont d'efeit essencialas per l'identitat dels grops e dels èstres a mai per la coexistencia pacifica. Constituisson un factor estrategica per la progression d'un desenvelopament durable, e per una articulacion armoniosa entre lo global e lo local.
Prenon una importancia capitala per atenjer los sieis objectius de l'educacion per totis(EPT) aital que los objectius del Milenari per lo desevelopament (OMD) sus quals las Nacions Unidas se son accordadas en 2000.
Coma factors d'integracion sociala , las lengas occupan d' efeit una plaça estrategica dins l'eliminacion de la pauretat extrèma e del talent (OMD1); coma suspòrts d'alfabetisacion , d'aquisicion de las coneissanças e de las competençias; son essencialas per realisar l'ensenhament primari universel(OM2); la lutja contra lo VIH e lo sida , lo paludisme e d'autres malautias (OM6), per tocar las populacions concernidas , dèu de se menar dins sa lenga; la salvegarda dels sabers , e dels saber-far locals e autoctòns del biais d'assegurar una gestion durable del ròdols (OM7) est prigondament ligada a las lengas localas e autoctòns.
A mai la diversitat culturala es estrèchament ligada a la diversitat linguistica, com'o tornan remembrar la Declaracion universala de l'UNESCO sus la diversitat culturala e son Plan d'accion (2001), la Convencion per la salvagarda del patrimòni cultural immaterial (2003) e la Convencion sus l'aparament e la promocion de la diversitat de las expressions culturalas (2005)
Mas dins qualquas generacions , mai de 50% dels 7000 lengas parladas dins lo monde ariscan de desapareisser. Mens qu'un quart d'elas son uèi utilisadas a l'escòla e dans lo ciberespandi , e per la majora part solament esporadicament. D'unes milièrats de lengas- malgrat que siaguessen perfeitement mestrejadas per las populacions e que son un mejan quotidian d'expression -son absentas dels sistèmes educatius , dels medias , de l'estampatge e del domani public en general.
Tanben aquò 's una preissa d'agir. Consi? Es d'encoratjar e de desenvelopar de politicas linguisticas permetant a cada comunautat linguistica d'utilisar sa lenga primièra , o lenga mairala, tan d'a fons e mai que possible , comprès dins educacion , tot en mestrejant una lenga regionala o nacionala e una lenga internacionala. D'encoratjar tanben los parlaires d'una lenga dominenta de mestrèjar una autra lenga nacionala o regionala e una o doas autras lengas internacionalas. Que sol un multilenguisme mestrejat pòd permetre a totas las lengas de tròbar sa plaça dins nòstre monde globalisat.
L'UNESCO convida totes los governaments , los organismes de las Nacions Unidas, las organisacions de la societat civila , las institucions educatiuas , las associacions professionalas e totas las autras partidas presentas de multiplicar sos activitats pròpris en favor del respecte , de la promocion , e de l'aparament de totas las lengas , subretot las que son amenaçadas, dins totis los sicuts de la vida professionala e colectiua.
Que siague per d'iniciativas dins lo domèni de l'educacion , del ciberespandi , del trabalh dels letrats ; que siague per de projèctes per la salvagarda de las lengas amenaçadas o sus la promocion de las lengas coma aplech d'integracion sociala , que siague per descubrir lo ligam entre lengas e l'economia , entre lengas e sabers autoctòns o entre lengas e creaccion , es important de promoure de pertot l'idèa que "las lengas comptan!"
La data del 21 de fevrièr 2008 , novenca edicion de la Jornada Internacionala de la lenga mairala , prendra una importancia majora e sera una escasença fòrça favorable a l'enantiment d'initiativas per la promocion de las lengas.
Nòstre objectiu comun es de far coneisser , al nivèl nacional , regionala e internacional , l'importancia de la diversitat linguistica e del multilenguisme dins los sistèms educatius , administratius e juridicas , dins las expressions culturelas tanben que dins los medias , lo ciberespandi e los escambis comercials .
L'Annada internacionala de las lengas 2008 sera una astrada unenca per butar d'un biais decisiu dins la realisacion dels objectius.
UNESCO las lengas| Culture

mardi 4 mars 2008

Bonjorn,
Un còp èri que foguèri reponsable de trabalhs d'electrificacion al nivèl de 200 comunas de la Nauta Garona e d'una vingtenada dins lo Gers. Las meunas entrepresas que foguèron privatisadas al nom de recomandacions europeencas , recomandacions que son pas gaire seguidas quand s'agis de sinhar l'accòrd sus las lengas regionalas d'aici.
Ambe lo POC nous sem ligats a "una energia novèla per Mureth"
L'Unesco que recapta las lengas a mand de desapareisser mòstra que l'occitan , lo basc, lo catalan, lo corse, l'alsacian, lo breton, lo creòl, sont totes a mand de desapareisser. Dins la patria dels dreches de l'òme!! Tant que a l'ora d'ara , suls critères actuals de libertat fondamentala, e des dreches de l'òme , la Franca non seria pas recebuda al sen de l'UE!
Onte son las teles , las radiòs , las escòlas , las ajudas a las lengas amenaçadas, volontadas per l'UE? N'en vèsi pas. Son pas bestias los Franchimands. Las teles, la premsa a de rares excepcions son completament sosmeses.
Alara sabètz quand parlatz d'occitan , se pòd veire diferentas reaccions; I a lo tipe motonièr ; i parla patès ? Mas quna idèa ? Lo complexat : ieu lo compreni , mas lo parli pas... Lo flicard: de qu'es qu'aquelses que son contra la França , que semenon l'anarquia , veire las bombas... Puèi i a los , los asoraires , los aiatolàs de l'ortografa , que dison , mas consi an lo front de volontar s'enauçar al nivèl de la lenga de Molière? Per astre, i a los occitans vertadièrs que dison : ieu lo pepin la me parla e aimai plan... O encara ieu aimi plan lo rudbi , lo cassolet e de tot biais soi occitan mème si o parli pas.
Nosautres violentan pas degus. Demandem la libertat per totes.
2008 sera l'annada de las lengas. E Tolosa espèra d'èstre nomenat capitala culturala euròpeenca... Capitala de que? D'un païs que perd la sia lenga e qui vòl d'èsser elegit capitala culturala? Quun necitge!

La França faguèt reconeisser a la tribuna de l'Unescò lo drech a la diferencia , a l'excepcion culturala, lo drech de parlar sa lenga coma un drech democratic fondamental. Lo françes qu'es pas amenaçat dins França . Al revers qu'es en recuolada de pertot dins lo monde. Mas aquò's pas de nòstre fach.

Cada aucèl ten le drech de cantar dins sa lenga mairala. Es encara coma aquò que canta milhor.

Lo darrièr del borrut ven de morir . Se sonava Casenave . Refusèt la granda fèsta nacionala al jorn de son sebeliment. D'unes trobèron qu'avia de topet de se permettre de refusar aital l'omenatge de la nacion.
Foguèron de millions de se far chaplar al nom de la republica . Lor lenga plan viudanta pausava pas cap de problèma alara. Mas tre la patz tornada aquesta meteissa lenga venguèt un dangièr per l'unitat nacionala!
Mas l'enebiment de las lengas regionalas amaga mal la volontat egemonica e l'auturos mesprètz jacobin.
Que lo jacobin vèlha dins cada partit de l'estrèma drecha a l'estrèma esquèrra .

Al POC reivendiquem lo drèch d'eiretage, de viure al païs e de parlar la sia lenga se n'avem envèja.
Ambe lo Cristòl Delahaye e pel POC avem sinhat un programa minimalista de salvagarda qui compren un detsenat de punts , mas pas que tres sul programa oficial. I manca la bastison d'una escòla en dur , las sinhaleticas de las carrièras , las formacions dels personals comunals , l'usatge de documents oficials a l'ostal de comuna....
Co que fa un brava molon .
Alara Oblid o Amnesia? O Vergonha?

samedi 1 mars 2008

Eleccions Mureth


Aièr dins un article de la federacion del partit socialista de la Nauta Garona , foguèrem acusats de renegar dempuèi mai de siès mèses per adobar un accòrdi prepausat pel PS.
Es una vertadièra vergonha.Es fals. E tot aquò desconsidèra tota la còla del PS que sostenguèt aquela dicha.
Lo M...e lo K. A an pas jamais agut l'idèa de s'entendre ambe nosautres. L'article de la Despacha d'aièr n'es la pròva.
Cristòl Delahaye prepausèt a mantunas reprèsas de daissar la sia plaça, que lo cap PS o vòl pas que volon tot o ren.La politica del pieger. Se dis que ara que l'ex cap del PS es pus pels passes , aquò's son torn vengut. Vòl pas ausir quicòm de mai que d'èstre mossur PS a Mureth çò que sera pas jamai, levat en semblant.
Mas la conclusion es tarrible.
En assautant nòstre lista , lo PS ven de butar en davant la maquina de perdre.
Aquò vòl dire que son ja pas pus sus aquestas eleccions mas a las eleccions seguentas.
Lo Ps vòl èstre second aqueste còp e en posicion de ganhar lo còp d'aprèp.
Es curios d'en privat d'ausir de responsables del PS o de personalitats importantas diron que cal s'entendre , que faron tot lo possible per s'entendre , que cal trobar un mejan, e a siès jorn del vòta , de pujar aital d'òli sul fuòc.
Donc lo PS vòl pas ganhar e subretot vòl pas que la tièra Delahaye ganhèsse. Una brava leiçon per totes los amoros de la politica.