formacion del Causse Olivièr Lamarca

La formacion dels Causses d' Olivièr Lamarca per escotar un tròç clicar aqui sus

Sul Causse
rescontrèri un tipe
que lo sonavan John

disiá qu'èra d' Avairon
mas avia un brave accent american
e avia costuma de se
rebalar
amb un capèl de « cow boy » sul cap

m'avia aprés a pescar
amb una cauceta:
caliá far un trauc al cap de la cauceta
un trauc pro gròs
per que lo peis s'i poguèsse engulhar
sens que se trachèsse
qu'èra pres dins una trapèla

Caliá puèi
cabussar la cauceta dins l'aiga
la téner fèrmament
esperar que lo peis i passèsse dedins
e la tirar còp sec de l'aiga

Pescàvem pas grand causa aital
mas segon John
valiá melhor prene una cauceta blanca
qu'una cauceta negra :
disiá que las caucetas blancas èran mai eficaças
qu'atiravan plan mai los peisses.
Un jorn me diguèt qu'avia vist
un grand chinés
èra convencut qu'aquel grand chinés
que li avia demandat son camin
veniá en reconeissença
e que tornariá lèu amb d'autres chineses
mai pichons qu' el
amb de mapas grandas
e amb fòrças aparelhs de mesuras
e qu'anavan crompar tot lo Causse per i bastir d'usinas
d'usinas a far de tripons A.O.C.
Pels toristas e pel monde del pais
e tanben d'usinas a fabricar de vergas en plastic
per las femnas e los òmes del monde entièr
e que
mai tard
aquels chineses bastirián de barratges
que negarián lo Causse
per i daissar pas de traças
per aver pas de comptas de rendre a deguns
un còp las usinas tampadas
e los emplegats licenciats
disiá qu'avian pas gaire esitat
a enaigar las valadas entièras quand calguèt bastir
lo vaste barratge de las tres Gòrjas
en China centrala
alavetz
voliá lutar contra eles
voliá aparar lo Causse
d'un biais o d'un autre
voliá cremar totes los ostals que se trobavan sul Causse
e aquí doncas çò que faguèt
d'ostal en ostal
menimosament
que lo monde i foguèsse o pas
avia començat
primièr
per cremar los ostals a l' est del Causse
un còp lo fuòc alucat
daissava per sola traça
a posita de l'ostal
un cap de mòrt de plastic
redde e fluorescent
pr'amor qu'avia legit
dins qualque libre
qu'aquò espaurugava los asiatics

fin finala cresi
que vesiá
e qu'avia totjorn vist
de chineses sul Causse
a mens que foguèsson grècs
e qu'aquel John foguèsse chinés

Commentaires

Enregistrer un commentaire

Posts les plus consultés de ce blog

Encara una nuèch

l'escorsa