2013 Murèth als pès de las pistas . 2014 la nèu.

 

Aqueste matin , ai agachat las montanhas , lo solelh lusent de jòia , la bruma leugièra que s' escapa de la Tèrra fangosa quand es urosa de sa nuèch , o e me soi dich en passant lo berret : preni la veitura o lo velò.? Que la veitura te gasta la vista alara que lo velò te dona lo ritme natural de la passejada . Fin finala soi partit a velò en cantorlejant la cançon que ditz cresi: e canta que cante, canti pas per ieu, canti per ma mia que vòl de cabecon .... (Phoebus)

Es pas bèla la montanha?

Praquò que la montanha es bèla consi se pòt imaginar en vesent un vòl d'arondas que l'ivèrn ven d'arribar .....Ferrat.

Quand arribèri al cap de l'avenguda de las Pirenèus cregueri de trobar de nèu .tant que las vesiái pròche dins l'objectiu de la camèra .

Mai avancèri e mai demesiguèron las montanhas . Vai t' en comprendre tu? I trobèri de campairòls a caganha, qualques mercants de sòmis, de Maria Juanita, qualques pescaires de la man esquèrra, qualques femnas qu'apasturavan lo gròs , e fani?

Per ieu la lum subrebèla , e un raumas H1N1 veire N2 , un tiron atalentat per una mica de pan, lo plaser nèci d'en parlar e de prendre qualques fotos

Faguèri lo torn del lac. Alenèri lo fum de las veituras que bronzinavan de longa sus l'autopista a miracles de Lorda e Baiona . Cap de miracle per aicí , pudisson fòrts los budèls d'escapament ....

Fin finala , me soi dich que tant valiá melhor esperar dins la plana , que de s'arencar als acrins , subretot ambe un drèlh pichon a la man . ... absurditat del vielhum , ont degun va pas pus .

Mas en 2014 lo caldrà plan escaladar l'arbre de mai ....  Los remontas penjals son ja arribats. Me fan los pelses blancs.