dimanche 6 octobre 2013

Alienacion e democratia

Alie-Nacion Occitana? Simptòmas de l'a-democracia e de l'esquisofrenia universalista generala dins Occitània.






Soi a pron pena tornat d' Italia que la lectura d'unes articles del Jornalet , al subjècte de la Nacion Occitana , que m'an donat l'enveja de parlar de l'alie-nacion Occitana e de l'estat de la democracia dins lo bèl pais dels dreches de l'òme, de la femna, e dels caganhons .
Tomba plan que Hollande ven de vistalhar lo Conselh Constitucional , per i dire que la Cinquena republica èra bravament polida e que li calia ren cambiar. Pels que sabon pas , lo Conselh Constitucional representa un dels multiples «formatges» (veire CSA tanben) de la Republica , (vin de Bordèu a totes los estatges) qu'a per mission de verificar la constitucionalitat de las leis, e qu'es compausat d'una brava majoritat , d'òmes e de femnas de  « drecha » nomenats pels quatre o cinq personatges «majors»que passan son temps a se tornar l'ascençor. (presidents , que siá de la republica , del senat , de la cambra ...ece)
 
L'occitan mejan refusa pas l'idèa de Nacion Occitana , mas trantola que contunha de creire que Franca es lo quite Exemple de la Democracia . Solide que los occitans creson viure dins un fara de la democracia mondiala , e a mai creson que lo monde tot , espèran de contunh, la paraula de França per s' « autorisar » a pensar , e comprendre lo monde.
Cal senhalar als occitans badaires del sègle de las Lums que tot aquò es acabat dempuèi de sègles justament...
Primièra remarca : dins Itàlia se parla pas cap francés , alara que la lenga n' es pròcha. Cregueri d'en primièr qu'èri tombat sus de francòfòbas , mas d'en pertot èra çò meteis. Fin finala causiguèri d'i parlar occitan e encapèri de me far comprendre qualques còps...
Los italians , los joves an causit de parlar angles e de cantar en angles... Coma dins França...

Iconografia comuna occitana : un fum d'occitans se remembran encara de las paginas «gloriosas» revolucions de 1789, 1793 1830 1848 ece...
Solferino per exemple .

Afiguratz vos qu'en 1848 las armadas francèsas venguèron esclafar los italians de Roma que venian de declarar la republica... L'armada de la libertat qué!
Istoricament e adrechament los libres d'escòla capitan plan d' ensenhar , los episòdis gloriós e sovent ensagnosits, de l'istòria de Franca , quitament quora foguèt ela que maselèt a bèls braçats ... I a un acòrd antica, drecha-esquèrra sus aquí, una mena de consensus. Cò qu'explica benlèu per de que l'occitan francimand sèrva la sentida d'èsser un actor major al mitan d'un pòble rebèla e fièr que se revòlta (rà?) de longa, contra l'absolutisme ... (veire l'istòria reala de la resisténcia mentre la darrièra guèrra o la de las desertions mentre totas las guèrras de la republica )
Notatz plan que la decision de far la guèrra dins Libia , Mali , Siria es presa dins França pel president tot sol... Quun pè mon fraire, aquel poder gigant, coma lo de l'emplèc de la bomba H !!! Coma democracia se pausa plan. França a oblidat consí Cameron, lo pus acarnassit contre Assad demandèt un vòte a la cambra , dins Franca es pas necessaris de se plegar a n' aquelas fotraladas .... Hollande se retròba tota sol d'aquel biais!!! E d'un biais sentèm plan que Hollande arriba pas de digerir aquela sembla guèrra mancada, sa guèrra envolada, panada , pel parelh Poutine - Obama, que lo daissèt sul sable sol e nud, alara que bracejava melhor que Blair al temps de l' Iraq . De que s' amaga jos aquel capuditge? L'argent del Qatar? de l' Aràbia Seodita ? O saurem pas . E l'occitan mejan se'n chauta ... Contunha son raisve de totes los òmes egals ... Dins aquela istòria, Poutine s'amerita lo Prèmi Nobel e pas Hollanda qu'es vengut un canhòt dels americans, que trompetèt per la guèrra, e que tròbi curiós , socitós... Que seria capabla de nos embarrar dins totas las aventuras??? sens s' assegurar de las arrièras e dels aligats? .. Question

Uèi sabem que los elegits son plan pagats. França es lo pais ont un ministre de finanças pòt aver una femna qu' aconselha per la fugida fiscala, quand es pas lo quite ministre, çò primièr que lo far per son compte. Ont un fum d'elegits de drecha e d'esquèrra s' emplen(èron) (an?) (aràn?) las pòchas ambe l'argent public o privat ( darrièr escandal l' argent de las escotissons de la caissa patronala de la metallurgia) ) veire encara l ' afar de las fregatas de Taiwan , la de l'Aràbia Saodita, la del jos-marin del Paquistan e tant d'autres . Solide qu'avèm una constitucion que cal pas cambiar d'un pet, que cada elegit s'i pòt trobar una bona retirada e d'ajudas de totas menas.
Democracia locala: al nivèl local lo conse es quitament lo papa del POS . Betuma tot sol, coma vòl quand vòl. Es que podèm votar ?, parlar dels projèctes? de l'usatge de l'argent? De la causida ? ... Que non.
Al nivèl «societal» l'estatistic mòstra qu'una femna es violentada cada ora , una tuada cada dos jorns e son salari quand trabalha , «quitament dins los trabalhs de mèrda» es de vingt % de mens que lo de l'òme.
Remembrem nos consí la drecha es majoritària dins lo «pais» al subjècte de la pena de mòrt, o del maridatge omo...
Escòla : França es al mitan del tablèu .
Preson: França es en bas del tablèu
Caumatge : França es al mitan....
Actes de racisme : Franca es dins lo naut del tablèu...
Respècte de la diversitat de las lengas : chut...
Ministèri de l'interior et policia : politica gaireben « franquista » , caça a l' ETA , caça als ròms , caça a la cara, contraròtles nombroses pels joves , pels arabis , pels negres .
França es pas mai una tèrra d'asil, de libertat, qu'o foguèsse un còp èra? (veire l'arribada dels «espanhòls» mentre la Retirada, italians , poloneses ) . Als estrangièrs , lor agradan melhor Anglatèrra .
Reaccions etnica ? D'un autre costat sem plan forçats de remarcar que dempuèi que fan pas mai petar los ostalses bastits en violacion de la lei , la Corsa se betuma lèu lèu, e mai que mai . ( immòbles prètz + 127%). Cal dire (sens regretar las bombas) que la forma de poder reial e centralisat aplecha plan las combinas de totas menas e ajuda plan los promotors .

Mecanisme de decision politica dins Franca, e madurason democratic o l'atge de la peira talhada: exemple la retirada que los joves nascuts en 1973 poiràn pas partir abans 66 ans passats e qu' ambe 43 annadas d' escotison tocaràn pas la pension plena .A cada decision fondamentala , los sindicats manifèstan. Va plan, aquò's seria democratic ? . Se sem 2 milions, ne'n comptan pas que 500 000 mila, se sem vertadièrament 500 000 aquò's un fracatge... Doncas comptan los pès , lèvan los infiltrats , e divisan per quatre ... E tot aquò fa que n'avèm un confle de marchar per de ren !!!! En seguida i a una declaracion «politica» : lo poder a recebut , escotat , compres,( vocabulari de l'ENA). Qualques còps ditz: es pas dins la carrièra que se fa la lei (Rocard un còp èra, lo paire de la CSG , la talha de la talha) , aquò's pas la carrièra que comanda (Fillon). França es campiona del monde dels debats, de las discutidas , de las parlicadas , de las comissions truca-luna de totas menas. Es la democracia ? Mas demandar als ciutadans, de votar coma en Soïssa , Finlàndia ambe (o sens) internet . Que non, i pensatz pas monsen , seria lo çaganh ...
Ja pron bèl .... Òm vòta un còp cada cinq ans, sus de programas falses , que seràn pas tenguts, que son jamai tenguts....
Causida del nuclear? òm vòta? Que non...I pensatz pas ... Quina idèa!
Lo deute de l'Estat que representa l'argent nòstre, prestat a l'Estat , per las bancas privatisadas (lei Pompidou de 1973) ? Ne parlam? Se'n parla? Ont? Que non. Pas cons nosautres sem una democracia non...
Las darrièras eleccions municipalas mostrèron que lo FN opausat a l'UMP fregava los 50%...
L'occitan mejan vòta de mai en mai del costat del fasciste, del raciste, del xenofòb, quitament ont i a pas cap d' estrangièrs...
L'occitan crei que la democracia es una seguida de protèstas dins la carrièra , entrecopadas, de parliquejadas sens fin, en jos comissions, mas sens poders reals de decisions.
Es ora de dire que deman França risca fòrt de virar fascista, e es ora per maites occitans de sortir de l'alie-nacion istorica que lor fan creire a aquesta democracia de farlabica.... O de creire que l'Euròpa los va tirar d'aquel malpas !!!





Aucun commentaire:

Enregistrer un commentaire