L' Euròpa es l'Avenir de l'Òme............Occitan?

Euròpa es l'avenir de l' Òme Occitan ?

Ven coma una rèssa per d'unes occitanistas. L' Euròpa va nos salvar.
Revèrta a una evidéncia.




França vòl nos crebar e doncas Euròpa va nos salvar.
Ieu i cresi ................ a mitat.
Qu' es vengut lo temps de se pausar qualques questions sus çò que sembla de mai en mai un postulat occitanista de cresent . ( Un postulat ? lo d' Euclide (me sembli) ditz que doas drechas parallèlas se rescontran pas jamai e doncas necessita pas cap de demostracion.) Se pòt verificar a la nòstra escala umana , en marchant sus un trepador , en rotlant entre los ralhs d'una autò-rota , mas se pòt pas verificar a l' infinit, qu'i podem pas encapar. Ara i a pas mai ren de solide , vist qu'Einstein demostrèt que la gravitat pòt torcir los rais de lum que passan al ras d'una estela , o que l'aviadesa del referencial ten la proprietat de cambiar la durada del temps passat ( sabètz l'istòria de l' astronauta que viatja una annada a la velocitat de la lum e que tròba pas , a son retorn sus Tèrra que los dròlles de sos felens) ... soi pas pus segur de ren .
Cresi que se cal mesfisar de las evidéncias o de las desiranças . Aquò te pararà plan de las desilusions melhor qu'una capòta..
Lo postulat occitanista ditz a quicòm pròcha( en resumit): l'Euròpa del nòrd es mai democratica que França , e las règlas nordicas van s'impausar , subretot lo federalisme , e lo respècte de las lengas minorizadas E Franca aurà vergonha de son : dins França per èstre egals cal parlar lo francés.
Cò que cresi pas vist que França contunha de donar de leiçons de democracia a totes e de far rire lo mond. E qu'ajuda de longa Espanha per exemple a matar los « separatistas »
D'en primièr cal espiar menimosament çò que se passa e se passarà , pels nòstres amics catalans.
Cresi qu'aima pas lo monde que fan d'istòrias. Que fan de bruch , que treblan las costumas.
Benlèu m'engani, mas ai la sentida que l'idèa de l'Autonomia / Independéncia agradèsse pas fòrça al Barroso, e autres afogats del estatut-cò ...
Me diretz que l'Euròpa ajudèt a espetar la Iogoslavia , que li agradèt fòrca d' espetar la Checoslovaquia. Òm vei plan que s' espelfòrça de traire Ucraïna o Moldàvia de l'esfèra de gravitat de Russia.
Mas tre que se parla d' Estats de l'Euròpa de l'oèst , aquò's pas çò meteis. Aquí avèm los vièlhs imperialismes aquí avèm la luta etèrna. França somiava de far una Euròpa a l'imatge de França.
De paises qu'an portat la civilizacion de pertot dins lo Monde , Africa , Asia ,America .
Cal seguir encara l'evolucion del sicut per l' Escòcia qu'a l' astrada de flotar sul petròli de la mar del nòrd.
Dobti , mas dobti ( levatz me d'un dobte!) èsser o pas èsser Occitània aquí la question
Se nos fisem a la situacion de Grècia , d' Espanha , del Portugal , d' Itàlia , (qu'es melhora comptablament parlant que la de Franca) devèm plan realisar qu' i a pas gaire de solidaritat , de ligams socials , d'ajudas estatalas, que tot se fa e contunharà de se far dins la sang e las lagremas e que lo pòble va pagar fòrt per las « errors » de las bancas .
qu''Euròpa va de Lampedusa a Sangatte?
Los occitans se tròban dins un pais que sa classa politica d'esquèrra extrèma a la drecha demasiada, d'un cap a l'autre , es particularament contra la diversitat linguistica ( pel melhor se'n chauta , o se'n trufa) . L'egalitat es de parlar francés. Se parla pas francés amenaça l'unitat. E suls monuments dels mòrts i a un fum de tipes que parlavan pas francés e que son mòrts per França .
Doncas aimariái ben qu'òm  m'expliquèsse un jorn, per de qué fasèm mina de creire que l'Euròpa nos ajudarà deman a far quicòm?


Commentaires

Posts les plus consultés de ce blog

Encara una nuèch

l'escorsa