jeudi 19 décembre 2013

Ils ont des chapeaux ronds.....Et vive les bretons...


Benlèu que la signatura de la Charte des langues cambiarà pas gaire l'avenir de la lenga d'òc mas solide tanben que la signatura d'aquel tèxte pòt cambiar prigondament aquel avenir , se me fisi al libre que ven d' espelir sul acamp d'Estrasborg que se sona : Las Lengas de França.
Nos cal prendre en compte lo fach que totas las lengas de França se morisson mai o mens. E que l'estat pòt far çò que vòl dins la matièra. Lo francés a ganhat de tuar la diversitat, quitament mai se cresèm pas e volèm pas creire  d' èstre arribats al cap.
Lo darrièr badal: fin finala tot dépend dels òmes , de las femnas e de la volontat politica dels nòstres elegits(das).Qu'es pron bassa.
Benlèu qu'a l'ora d'ara an trapat una brava vergonha . França es lo darrièr pais de l'aver pas signada. Que d'elegits europencs serián venguts al Senat ambe lo rapòrt d' Alfonsi , jol braç, per parlar dels dreches de las minoritats e de las lengas dins França , l'afront major, qué pels lums de la libertat!
Que dison los saberuts sus la Charta ( tòrni al libre) qu'es possible de far un fum de causas dins aquel quadre : subretot per la socialisacion de la lenga , l'escòla ece...Mas que seriá ja possible d'aplicar l'estatut de Còrsa vist qu'i auriá pas violacion del sant article 2 sagrat ( evangèli segond JLDebre e Carrère d'Encausse e de democratas de la pichona camba coma Charassa e tan d'autres . Parlan de l'amenaça contra l'unitat de França , sens pensar a 1914 quora los peluts occitans parlavan en occitan dins las trencadas abans de se far tuar per centenats de milièrs . Qu' ambe l'article 75-1 podèm ensajar de far quicòm per salvar la lenga, ja un pauc.
Mas que cal èsser un pauc logic , que podem pas bramar un còp a 30000 a Tolosa per demandar la signatura de la Charta , e repotegar quand se'n parla quitament en semblant????
De tot biais nos fasèm pas d'idèas sus la volontat del governament d'esquèrra o de drecha e la volontat de salvar las lengas de França... I a un fum d'intellectuals occitans que se dison universalistes , e ciutadans del monde, ( es a dire que son penjats, talas las medusas dins la mar de las pensadas mondialas, benlèu dins lo voide de la pensada , pres coma de formigas dins l'ambra dempuèi la darrièra gelada del Permian , transparents despoderats e sols per afrontar los «comunautarismes» e que meton l'occitan sul meteis reng , que la secta Moon, la niqbab , veire lo tainou de J Chirac, le bambara , l'ossèt del nòrd-oest, o que creson aital mostrar sa grandor d'arma , alara que fan pas que desvelar son necitge, grimacejar son esperit «universaliste» de l'auçada d'un selon .
Imaginem pas un anglés abandonar sa lenga en te disent en mandarin, qu'es vengut un ciutadan del monde, un german te dire en hawaiian que se'n chauta el de la seuna lenga vist, qu'es per l'aparament de totas las lengas egalas al plan de la declaracion dels dreches de l'òme , mentre que la seuna crèba coma una bèstia malauta dempuèi mai de set sègles...Pichona e espantanta dubèrtura d'esperit de l'intellectual francò-occitan que pòt encara te dire que la lenga crèba a causa de las calandretas, de l'IEO , de l'empresa quitament estaliniana dels letrats occitans sus los diccionaris, e de la tòca falorda de RETROBAR las raices de l'Occitània tota qu' existísson pas, e de l'oblit criminal dels occitanofònas naturals qu'òm ausís pas mai, o es de lor fauta qu' aqueles vergonhós d'occitans la parlan pas mai!!!! Fin finala;;;; de lor causa .
Es a dire , poder dire tot e ren; levadas las causas evidentas , majoras de las rasons de la mòrt d'una lenga , reconegudas de pertot dins lo monde , pels saberuts ,es a dire la volontat d'un estat e d'una minoritat poderosa espaurugada de personas que creson totjorn als poders sobeirans del francés sus totes los bretons barbars del monde a començar per l'alemand , l'anglés e autres fotralengas inacabadas e bredonejadas.
Avèm en çò nòstre una brava garlanda d'esperits tant dubèrts que son venguts d'ostals dels corrents d'air , e las putas de quicòm qu'existís pas la republica dels dreches de l'òme e la democracia. Tot i tinda voide.. Es aital.
Cresi plan que la volontat de tuar las lengas dins Franca , pais occitanicide dempuèi qu'un Papa de Roma li donèt lo miègjorn, per l'ajudar a lutar contra un emperador germanica , es sinonim d'equilibri psicologica per aqueles òmes formats , geneticament modificats, pels reis , per l'emperador e fins finala , formatats dins l'escòla de la republica de J Ferry ( que nos donèt Argeria 1100000mòrts  ) e l'armada , dins l'idèa que lo francés es la lenga mèstra , qu'es la lenga de la desliurança , de l'educacion, de las libertats, que supèra totas las autras. Ne sèm encara aquí. Podèm encadenats d'esclaus , tuar los comunards, caçar l'arabi, roïnar euròpa dusca la Beresina, far la guèrra de pertot ,aquò's aital. Los nòstres intellectuals fan la leiçon al monde ambe las mans rojas de sang.
Cal prendre las paraulas d'Ayrault per çò que son: un gèst pels, bretons e sonque a elses ( après los còrses)_ que donan curiosament  rason a totes los, que fan petar quicòm, e sonque a elses. Vòli pas dire que cal far petar quicòm, mas en fintant de mai près , es pas la morala de l'istòria? quand me nòti que M Vals ditz que la republica pòt pas pas tolerar dins Corsa l'existéncia d'una autra lenga oficiala....
En esperant nos cal prendre çò que tomba e çò qu'existís ja. Coma lo rainal a l'espèra d'un fromatge.
Lo melhor es per la fin. Deman França bastirà de monuments als mòrts per las nòstras lengas e se demandarà per de que diaussis las parlam pas mai e nos direm la responsa : per de que francés es la mai linda e la mai bèla....E l'intellectual occitan universalisaire, dirà : it's true ... I say you , this slang isn't speak more by occitans. ..
Lor vendràn alara los biçòls de l' uniformitat... Lor desirem a totes un bon prurit.

Aucun commentaire:

Enregistrer un commentaire