Beresina PS en vista

Bastir a contra sens .           

Basta!

Pel primièr còp un movement ciutadan ensagèt de botar al còr de la campanha de las municipalas, la question de l'avenidor de la lenga e de la cultura d'òc. I cregueri...

Lo biais èra clar , l'idèa polida, lo caminament tanben.

S'agissiá per nosautres de botar l'elegit candidat en fàcia de sas responsabilitats....

Doncas caliá rescontrar totes los responsables candidats sens esperit de capèla, de drecha , del mitan , coma d'esquèrra, totas las tendéncias politicas e, escambiar , demandar qual podián èsser los punts d'acòrdi sus una brava tièra de questions, que son gaireben ( per resumir) las de l'esquèrra ecologica, mas ambe nòstra bandièra, la Caracteristica Essenciala, Majorala , a saber l'avenidor de nòstra lenga , de nòstra cultura, del nòstre pais.

Bastir a la debuta pareguèt lumenós , d'un anament quitament matematic.

• bonjorn sénher responsabla UDI : avèm aquí un braçal d'idèas occitanas que nos tenon al còr . De que ne pensatz ? Volètz far un tròç de camin per Occitània?
• bonjorn sénher elegit UMP: aqui las nòstras idèas de Bastir! De que ne pensatz? Ren ?
• bonjorn sénher elegit PS ! PRG!  Avètz vist? La nòstra lenga es a mand de crebar! Volètz plan far quicòm? Avètz tot lo poder dempuèi 6 ans ! Podètz far quicòm?Non per de qué?
• bonjorn sénher conselhièr PCF volèm salvar la nòstra lenga , volèm un ensenhament à l'escòla mairala.... Qual vòl salvar la lenga d'òc ? I a mai a far?
• adieusiatz sénher EELV avètz aquí un programa besson ambe a mai l'Occitania. La volètz?

Levat que tot se debanèt pas aital. Levat que la part majora de las discutidas se debanèron ambe los partits d'esquèrra. Levat que mantunas entrevistas aguèron pas luòc. E que la passejada se limitèt a rescontrar mai que mai los elegits poderós e majoritaris, es a dire lo monde del PS .

Diretz, normal de discutir ambe los que tenon lo margue e lo poder.

Levat que la question de la lenga venguèt d'en primièr una question pausada al PS , pron alunhada de l 'anament previst.

Bon çò qu'es fach.....

Sabèm ja que fòrças CAM van cambiar de mans.

E doncas quand los resultats arribèron , ambe la casuda verticala del PS , foguèrem forçats de realisar l'engana doble, - 1  per de qué s'agissiá d'un metòde irrealiste , 2-que nos ligavam al fracatge d'un partit .

Mas la davalada es pas acabada. Sabèm ja que fòrças CAM van cambiar de mans.

Resultat : per fòrça novèls elegits de drecha , lo movement Bastir serà mai sovent sentit qu'un aligat de mai del PS , coma lo PC e lo PRG....

Lo Senat va cambiar de mans. Adieusiatz la signatura de la carta europenca de las lengas minorizadas qu'èra mal enmargada o sabi.

Per anar un pauc mai luènh: vesèm plan que las eleccions europencas revertaràn una Beresina pel PS, que risca fòrt de venir la tresena veire la quatrena fòrça politica de Franca .

Lo president qu'ausiguèt plan lo messatge , mas que l'escotèt pas o mal? decidiguèt sul pic de nomenar Vals lo catalan nascut de Barcelona , curiós, mas o lo president ten un brava problèma d'otita o de gautissons, o a decidit de roïnar sa formacion politica , o se pensa pas qu'a sa reeleccion (probable)...

Que tornamai decidiguèt de nos sarrar la cencha d'un trauc , per acontentar los accionaris dels fons de pensions que son de monde trabalhadors coma cadun o sap.

D'un biais lo president revèrta de mai en mai Guy Mollet, que finiguèt per sonar en 1958 lo Grand Carles .

Après la seleccions europencas benlèu quora aurà ausit encara melhor , ( fòrt destapament d'aurelhas previst) benlèu sonarà , Fillon , Juppé o per que pas Marina , qu'es venguda d'aquel temps, la revenja dels pès negres dels miègjorn ( mas es una autra question).

L'emperador del pais dels fromatges pren lo camin reborsièr , cresi que va tornar menar lo PS al nivèl de la SFIO d'antan ...

Se pòt sénher? Oc es en camin l'òme. I fa ....

Per acabar ambe aquela istòria  pivelanta ( mas  malastrosa) Hidalgo venguèt conse de Paris , benlèu m'engani, mas que cresi pas a l'azard, que Madrid saludèt los dos eveniments , cossí creire qu'es pas un marrit signe per l'avenir de Catalonha ?

De tot biais l'ora es venguda de se ligar ambe los verds d'esquèrra e s'alunhar lèu del TITANIC PS .