jeudi 7 février 2008

Naissenças M Andriu


E foguèt batejat l'enfant
sus una man que pendolava
del ventre de sa maire...

De crits lo vomit
la paur
unas dolors
un flume d'aigas e de sang giscle negre
dal mai fons escupit per l'esquiçal
roge
d'un ventre claufit
desconflat en un còp

E tu blau
blau penjat de la còrda blanca
tu
crussòl sanhòs d'acides e de basas recampats
al mòtle de ta carn rufida
ja portaires del retrait de ton vièlhum
tu
confrontat ambe la vida espaventabla
ta vida
qu'avias a degun demandada

Aqui ton naisser filh de l'òme
ton naisser
dins un crid qu'englasia Diu
dins son taüc

... E foguèron sebelits
en un lençòl de tèla blanca
la maire
e lo dròlle que non volguèt venir.

M Andriu 1976

Aucun commentaire:

Enregistrer un commentaire